Cupitgolas, tgaupézs e segls cumplicai
L’acrobatica pretenda habilitads coordinaturas ed ina gronda cundiziun corporala. A Glion han biebein curonta affons e giuvenils dall’entira Surselva demonstrau la sonda vargada lur savida acrobatica. La Scola da circus Surselva ha envidau alla tiarza concurrenza d’acrobatica che ha giu liug ella casa da scola digl emprem marcau spel Rein
Il diember da 40 affons e giuvenils che prendan part d’ina concurrenza d’acrobatica muossa che quei sport ei tschercaus. Entschiet per propi cun l’instrucziun d’acrobatica ha Anja Klittich Berther da Mustér ch’ei sezza stada acrobata da renum en Tiaratudestga. Ed avon paucs onns ha ella survegniu il sustegn da Mikhail Semenov ch’ei – suenter che l’uiara ell’Ucraina ei ruta ora – fugius en Surselva cun sia famiglia ed ei vegnius animaus ella Cadi d’entscheiver sco trenader d’acrobatica. El ha era menau la concurrenza d’acrobatica a Glion la davosa sonda ensemen cun Maria Dunst dalla Scola da circus Surselva e cun Maycon Duff da Mustér.
Circus ed acrobatica
La clownessa Maria Dunst che ha iniziau e che meina la Scola da circus Surselva ha detg enviers la FMR che l’acrobatica seigi ina cumponenta impurtonta da mintga scola da circus. La concurrenza d’acrobatica che hagi liug per la tiarza gada a Glion seigi vegnida iniziada dil trenader Mikhail Semenov: «Mikhail ei in cass da cletg per la Surselva e perquei vulein nus dar il support necessari ad el.»
Maria Dunst ha tratg ina bilanza positiva dalla tiarza concurrenza d’acrobatica. «Mei fa ei surstar con disciplinai ils affons ein e co els sepreparan mintgamai sin lur cumbats sportivs sil teppi d’acrobatica.» Mikhail Semenov seigi in stregn scolast d’acrobatica, mo el sappi entusiasmar e seigi ina persuna da bien cor, ha ella manegiau.
«Ins senta ch’ils affons han fetg bugen el.» Per ella seigi ei era stau bi che tons geniturs hagien priu part sco publicum alla concurrenza. Quei seigi la megliera motivaziun pils affons, ha Maria Dunst detg. La clownessa ei oriunda dall’Austria, viva a Sagogn ed ha in agen atelier da scolaziun per clowns a Schluein el casti Löwenberg.
Bialas prestaziuns
Il trenader Mikhail Semenov ha manegiau che sia finamira sportiva seigi da contonscher entgins buns resultats ni schizun da gudignar medaglias al proxim campiunadi svizzer d’acrobatica che ha liug miez zercladur a Winterthur. «Jeu stoi dir ch’ils affons e giuvenils han fatg in bien progress ed ein cuntents. Ed ils geniturs ein era cuntents.» Ei seigi bien da saver porscher era aunc in auter sport en Surselva sper igl ir cun skis, dar ballapei e giugar unihockey, ha il trenader detg. Sper il campiunadi svizzer selegri el era fetg sil secund campiunadi grischun d’acrobatica che ha liug ils 21 e 22 da november a Mustér. «Per atletas ed atlets ei il campiunadi grischun ina pusseivladad oreifra da semesirar.»
Ei va vinavon
Las concurrenzas d’acrobatica dalla Scola da circus Surselva a Glion duein haver liug era el futur. Las proximas ein igl atun 2026 e puspei la primavera 2027. La menadra dalla scola Maria Dunst ha getg che l’acrobatica seigi in grond sustegn per sia Scola da circus Surselva. Enteifer quella detti ei gia ina gronda purschida d’activitads. «Jeu vegnel strusch da far tut quei che jeu fagess bugen. Jeu selegrel ussa fetg sill’occurrenza finala dalla scola che ha liug en duas jamnas a Sagogn.» La Scola da circus Surselva ei vegnida iniziada igl onn 2023 e fundada in onn pli tard (mira box).
Marca Surselva cun biaras purschidas
Rodund 80 affons, giuvenils ed entgins carschi laian inspirar dallas activitads dil circus en Surselva. Quellas vegnan purschidas dalla Scola da circus Surselva. La primavera vargada eis ella vegnida premiada dil Program San Gottardo ed ha aschia saviu profitar d’in coaching. La finamira dallas duas iniziantas dil project Maria Dunst da Sagogn e Bea König da Vignogn ei da francar la scola e sia purschida ella regiun. Igl interess persuenter ei gronds.
Pils affons e giuvenils sco per exempel Johanna Berther da Sagogn (foto) porscha la scola da circus novas pusseivladads d’activitad e divertiment. Quei ei l’acrobatica cun teila, ir cul velo d’ina roda ni sepresentar sco clown. La Scola da circus Surselva che porscha ils cuors ellas hallas da gimnastica a Glion e Sagogn offerescha era activitads per uniuns e fatschentas. In bus per ir cul circus ella regiun ei ina dallas finamiras digl avegnir. (fmr/mg)
Gust da leger dapli?