«Quei ch’ils Turitges san, savein nus era»

Las iniziantas dil schal dalla Val Stussavgia han entschiet il venderdis vargau a Cuera en la localitad dalla Botschaft Safiental alla Obere Gasse. Lur devisa: «Quei ch’ils Turitges han saviu far al Sechseläuten, savein nus era far.» Maya Messmer-Blumer da Val Stussavgia e la gestiunaria da Turissem Val Stussavgia Jolanda Rechsteiner han dau las empremas onzas pil schal numera dus.

Idea entras ina damonda

La tissunza Silvie Schaufelberger da Tenna che meina il project Tenna Tweed declara che l’idea da far caltschiel in schal al Sechseläuten seigi naschida tier ella e tier la producenta da launa nuorsa Anita Buchli dil bein puril Zalön a Stussavgia. «Nus havein survegniu ina damonda all’organisaziun Alpinavera da separticipar cun in stan al Sechseläuten. Epi havein nus ponderau ditg envi ed enneu tgei far. Surtut duvravan nus era ina sligiaziun en cass da plievgia.» El contuorn dallas persunas che legian las informaziuns regularas da Tenna Tweed hagi enzatgi proponiu da far in’activitad cun far caltschiel. «E lu essan nus vegnidas sill’idea dil schal. E quei ei stau in grond success», di Silvie Schaufelberger. Duront far caltschiel hagi ins udiu biaras historias ed ins hagi giu peda da sediscuorer ed emprender d’enconuscher nova glieud.

Far caltschiel trai

A Turitg han las dunnas dalla Val Stussavgia fatg aschi bunas experientschas e quellas han animau da far vinavon. Silvie Schaufelberger che ha era iniziau ussa l’acziun da far il secund schal dalla Val Stussavgia di ch’ei hagi dau glieud che seigi sesida varga in’ura e luvrau vid il schal. Ella e sia amitga e producenta da launa Anita Buchli vulan era cumprovar ils avantatgs dalla launa per purtar vid il tgierp. «Launa scaulda cura ch’igl ei freid e renda frestg cura ch’igl ei cauld», declara Anita Buchli a caschun dil kick-off pil secund schal a Cuera. In auter motiv ch’ins hagi decidiu da producir in schal da launa e buca per exempel ina capetscha seigi ch’in schal sappi ins prolunganir aschi ditg sco ins vegli.

Avantatgs pil turissem

Jolanda Rechsteiner, la meinafatschenta dil biro turistic dalla Val Stussavgia, ha beneventau las medias ella Botschaft Safiental. Far caltschiel seigi in’activitad che hagi in cert scharm e che attraigi era igl interess dils turists, di ella. «Da quellas acziuns sustenin nus bugen. Il patratg dil marketing stat senza dubi era el center da talas acziuns. Alla fin finala vulein nus gie attrer ils turists en Val Stussavgia.» Il viadi a Turitg seigi staus ina fetg buna acziun era ord il pugn da vesta turistic.

«Sco mistergneras dalla Val Stussavgia eis ei era stau impurtont per nus a Turitg al Sechseläuten da far enconuschenta nossa launa indigena che vegn producida ella val e d’animar la glieud da far caltschiel», di Silvie Schaufelberger. Quella launa derivi dallas 65 nuorsas che vegnien tundidas mintg’onn sil bein puril dad Anita e Simon Buchli a Zalön. El decuors d’uonn vegnan Silvie Schaufelberger ed Anita Buchli ad arver in atelier da teisser a Tenna. L’entira producziun da Tenna Tweed e da launa nuorsa indigena ein projects che vegnan promovi dil svilup regiunal Val Stussavgia (PRE) che ha sco finamira d’augmentar la valurisaziun ella val.

Zercladur entochen settember

Tgi che ha gust e peda sa ir igl entir meins zercladur a Cuera ella Botschaft Safiental a far caltschiel pil Schal dalla Val Stussavgia, Igl entir fenadur 2026 ei il schal a Valendau el Café Mäntig, igl uost dat ei la pusseivladad da far caltschiel a Thalkirch el Gasslihof ed igl entir meins da settember sesanfla il schal a Tenna egl Alpenblick. Quei seigi l’emprema etappa, dian las iniziantas. Sch’il schal seigi alla fin da settember buca liungs avunda, hagien ellas entginas ideas per realisar ina secunda acziun duront ils meins d’unviern.