Ün artist multifari ha dit adieu

Culla mort da l’autur, chantautur, illustratur, pittur e restoratur Paulin Nuotclà ha tut cumgià üna persunalità originala e cuntschainta tras tuot la Rumantschia. Sco quai cha sia famiglia ha confermà invers la FMR es l’artist multifari oriund da Ftan e Samedan mort in lündeschdi da Tschinquaisma in seis dachasa a Susch. Quai ill’età da 74 ons e davo ch’el ha pati dürant ils ultims ons da divers mals e malatias.

Da comics sur sgrafits …

Fingià da puob ha Paulin Nuotclà scuvert il plaschair per la pittura. Plü tard lura, davo la matura, ha el decis da far our da sia paschiun sia professiun. Dürant ils ons settanta ha Paulin Nuotclà frequentà la scoula d’art a Basilea ed es dvantà magister da disegn a Samedan.

Bainbod però han l’art e la tecnica dal sgrafit attrat si’attenziun – üna professiun a la quala el es restà fidel bod fin a la fin da sia vita. Indombrablas fatschadas da chasas, sulers, baselgias ed oter plü portan hoz il buol da Paulin Nuotclà. El nun ha però imbelli be fatschadas, dimpersè ha eir realisà – sco pittur ed illustratur – numerusas ouvras d’art in fuorma da purtrets, illustraziuns, caricaturas e comics. Las figüras per exaimpel i’l comic cun barba Jaquan, Niccal e Baldi sun dvantadas figüras popularas e stimadas, tant dad uffants sco eir da creschüts.

… a rock rumantsch – algordanzas eternas

Paulin Nuotclà es però eir stat cuntschaint sco chantautur e vala cun sias chanzuns in vallader sco pionier dal rock rumantsch o sco ch’el gniva nomnà dals ons ottanta «Il Bob Dylan da l’Engiadina». Chanzuns sco per exaimpel «Engiadina» o «Il prüm milliun» sun dvantats classikers illa musica populara rumantscha.

La lavur da Paulin Nuotclà lascha inavo blers stizis. Cun sias numerusas ouvras – in fuorma da texts litterars, pitturas, comics, melodias e chanzuns, e tuot las fatschadas nouvas e restoradas – restarà l’artist multifari da Susch a bleras e blers per adüna in memoria.

«So ed uossa nun haja plü ingün flà!»

Cun quists pleds ha ün stanguel, ma viv Paulin Nuotclà tut cumgià da seis ultim concert avant raduond ses eivnas i’l Hotel Palace Scuol. E daspö il lündeschdi da Tschinquaisma ha’l tut cumgià per adüna. L’artist multifari da Susch es mort ill’età da 74 ons – sias numerusas ouvras vivan inavant. (fmr/dm)