«Mantener quei ch’ins ha»

L’entschatta matg ha il cussegl da vischnaunca da Mustér refusau la damonda dalla suprastonza communala per in credit da 1,1 milliuns francs per sanar la patinera artificiala el Center Fontauna. Ils indrezs tecnics dil glatsch artificial ein en in schliet stan e pretendan in remplazzament. Sin fundament da quei conclus dil parlament communal dat ei negina patinera igl unviern vegnent a Mustér. Ils motivs dil cussegl da vischnaunca da refusar il credit ein stai il giavisch d’integrar la patinera en ina secunda etappa dil project cumplessiv da sanaziun dil Center Fontauna, mo lu era d’analisar variantas alternativas per in glatsch artificial.

Lantschau l’iniziativa

Ladinamein suenter la decisiun dil cussegl da vischnaunca ei seformaus in comite d’iniziativa consistents da Bruno Flepp, Manuela Maissen e Martin Quinter. Il text dall’iniziativa: «Mantener il glatsch artificial dil Center Fontauna entras far las investiziuns necessarias per ina sanaziun ell’altezia da 1,11 milliuns francs (+/- 15 %) cun ina reducziun dalla surfatscha da glatsch da ca. 20 % tenor messadi 20 – 2025/2028 al cussegl da vischnaunca dils 4 da matg 2026.»

Apparentamein eis ei buca stau grev da rimnar las 150 suttascripziuns pretendidas ella constituziun communala. «Entochen la mesjamna sera havevan nus gia 170 suttascripziuns», di il con­iniziant Bruno Flepp. Gliendisdis proxim s’entaupa il comite d’iniziativa ed entochen lu vegnan ulteriuras suttascripziuns ad esser rimnadas. Silsuenter sa il pachet vegnir surdaus all’administraziun communala.

Purschida per indigens e hosps

Pil comite d’iniziativa eis ei clar: La patinera ei ina purschida d’unviern sco auter era a Mustér. «Igl unviern vargau ein rodund 2000 frequenzas sil glatsch vegnidas registradas», constatescha Bruno Flepp e manegia: «Sche la vischnaunca ha direct ni indirect 1,75 milliuns francs per ina halla nova, lu s’auda ei era da mantener quei ch’ins ha.» El hagi giu il sentiment ch’il cussegl da vischnaunca seigi staus sut pressiun tier la tractaziun da quella fatschenta. Quei declari lu era empau il resultat satel dalla decisiun. «Jeu capeschel era buca daco ch’il cussegl ha buca semplamein returnau la fatschenta alla suprastonza communala, pretendend da reponderar il project», di Bruno Flepp. Negin tema ell’iniziativa ei la purschida da stad per 390 000 francs che la ­suprastonza communala haveva medemamein proponiu al parlament ­communal.

Festginar

Bruno Flepp ei era president dil Club da curling Mustér. Pertuccont quella rolla di el: «Il curling ei buca il motiv en quei connex. Nus essan 20 commembers e da quei ein 13 aunc activs. Mo per quels stuein nus buca mantener il glatsch. La patinera ei ina purschida per indigens, famiglias e hosps da vacanzas ch’ei appreziada generalmein. Ella ei era ina part dalla Golden Card.» Cull’iniziativa vegli il comite ch’il pievel sappi decider. «Nus lein festginar e surdar ton pli spert il pachet cullas suttascripziuns alla vischnaunca per che la votaziun sappi succeder il proxim temps», di Bruno Flepp. El seigi aunc adina dall’idea che la sanaziun fussi pusseivla quest atun, aschia ch’il glatsch stessi a disposiziun era igl unviern vegnent.