Tut che ha spitgau vess sin Pippin

La sera dalla premiera eis ei stau plitost frestg, denton schetg. Buca in pluschin ha disturbau l’atmosera el curtgin dil casti Aspermont. Leu ha l’Uniun da teater Sagogn cul reschissur Manfred Veraguth envidau ad ina sentupada cul prenci-uestg Tello. Curdin Venzin ei sefultschius ella rolla dil descendent dalla famiglia dils Victorids. En sia residenza a Sagogn eis el vidlunder da dictar al scarvon Valerius (Guido Tschuor) gl’inventari da siu fatg en Surselva. Igl ei buca pauc. Valerius ha denton tut auter el tgau che da scriver il text per siu patrun. El ha seit, ed era la fom s’annunzia. Columba, la fumitgasa (Anna Welter), la cuschiniera Maloma (Martina Beeli), e Lubuzi, in pur dil vitg (Roman Niederberger) entran, mintgina e mintgin forsa buca gest il dretg mument.

Plein verdads humanas

Arclina, la survienta da Tello (Georgina Janki), diregia ils fatgs digl uestg da Cuera ch’ei en sia residenza ella provinzia sur la Ruinaulta. Arclina para da tener enta maun tut ils fils. L’atmosfera el curtgin dil casti ei unica. Cun mirar ed observar las scenas, cun tedlar ils carstgauns, cun lur fleivlezias humanas, varga il temps ch’ins s’encorscha buc.

Il publicum sesa sin sutgas cumadeivlas sin ina tribuna tschinclada d’in mir. Il giug «In asen per Tello» vegn ora hectica e currem. Persuenter cuoran ils plaids vi e neu. Ina prestaziun admirabla dils acturs laics da memorisar ton text. Las scenas ein cungidas cun verdads humanas. Cu il currier dil retg Pippin arriva (Hans Niederberger), crescha la tensiun. Il retg cun sia cuort duess arrivar a Sagogn. Neginas gesticulaziuns, smanatschas e nauschs plaids dat ei. Persuenter in sault nunspitgau. Las acturas ed ils acturs, vestgi els costums historics, fan las preparativas. Sin tribuna cumpara Pippin denton buc. E gl’asen misterius vegn pér ella pli davosa scena.

Il toc che l’Uniun da teater presenta actualmein sebasa sillas figuras da duas persunas historicas: Gl’uestg Tello che ha viviu el temps medieval tumpriv, ed il retg Pippin. Els cudischs historics ei quel enconuschents sco Pippin il cuort. Naschius gl’onn 714 e morts il 768 ei staus il bab d’ina figura dominonta dalla historia europeica: Carli il Grond. La cumedia en quater part da Manfred Veraguth gioga a Sagogn, in vitget agl ur dil reginavel dils Francons. Gl’auditori empren d’enconuscher e d’appreziar quei vitg e sia glieud. Suenter la producziun dat ei lu era ina surpresa culinarica nunspitgada.