Tedlar il resun, prender peda per quel

Igl ei buc in product dil consum spert. Tedlar las canzuns, semplamein consumar ellas denter duas autras occupaziuns, funcziuna strusch. Tgi che vul capir gl’album niev dad Astrid Alexandre, e profitar digl effect e digl eco che quel evochescha, sto veramein prender peda. L’artista introducescha gl’album Resonanzas cun in agen text en lungatg franzos. Per la FMR ha ella translatau il text per romontsch:

Ei drova artist:as. Buca per decorar ils mirs.

Buca per emplenir ils silenzis malemperneivels.

Ei drova artist:as perquei ch’il mund ei condensaus e spess.

Memia spess per vegnir traversaus senza paus. Mintgaton memia violents per vegnir supportaus en silenzi.

Encuretg il dialog

Dapi 20 onns scriva Astrid Alexandre atgna musica. Maina ha ella vuliu seschar encadenar en ina sparta, respectiv semetter en in truchet. La libertad ei decisiva per ella. Quella lubescha da sesviluppar. Ella seigi en emprema lingia cantadura, puntuescha ella el discuors culla FMR. Per siu album Resonanzas haveva ella scret e rimnau massa canzuns, spitgond silsuenter sils resuns. Per sias canzuns romontschas eis ella seschada inspirar da poesias da Jessica Zuan, Tresa Rüthers-Seeli, Alfons Clalüna e Benedetto Vigne.

Per producir la musica digl album eis ella lu stada a Berlin. Lu ei la gronda lavur aunc buca stada a fin. La creadra musicala ha encuretg resuns ed ei entrada en dialog cun autras persunas. Resonanzas, pia quellas reacziuns sin sias canzuns, quei brat artistic, ha ella survegniu, sper auters, da Jessica Zuan, Gianna Olinda Cadonau, Pia Valär, Riikka Läser e Mayk Wendt. Lur resuns ha ella integrau el project.

L’empatia inspironta

«Resonanzas» ei en mintga cass buc ina collecziun convenziunala sin in disc cumpact. «Jeu hai luvrau quater onns vid quei album. Ed igl ei vegniu exact co jeu vulevel», concluda ella. Persunas che vulan semplamein consumar musica ston s’endisar vid la fuorma da quei album. Il cuntegn savess’ins resumar cun: «sferic, reduciu, cun bia flad». «Resonanzas» ei buca musica da sault. Ins ei sfurzaus da tedlar, dad esser silenzius e da seconcentrar sin in messadi. Eis ei pia in product meditativ? Astrid Alexandre lai buca valer gliez. Ella accentuescha il plaid «empatia». Egl album niev metta ella buca sias historias el center, mobein il brat cun auters. L’artista lai spazi d’interpretar e da s’exprimer.

Las diesch canzuns ha ella produciu tenor in concept clar ed exact. Igl ei ina lavur cun ina reit da persunas. E quei duess’ins sentir. Ella ha tedlau, discurriu, legiu in text ni in cudisch. E fatg ordlunder musica. Quei ch’ella ha percepiu, sviluppescha ella vinavon cun autras artistas ed artists.

Buc in «booklet» convenziunal

Sias partenarias e ses partenaris dil project han creau vinavon la musica. Riikka Lässer ha sviluppau in sault sco resun e contribuziun. Rees Coray, il bassist sursilvan, ei il partenari musical pli impurtont digl album. Tschun dallas canzuns ein en romontsch, treis en engles e duas en franzos. El center seigi buc ella, puntuescha Astrid Alexandre puspei. Sia vusch caracteristica denton. Quella semida gest tenor raquent e cuntegn.

Ei seigi veramein ina gronda «chista», quei ch’ella presenti ussa, tradescha l’artista pertuccont las «Resonanzas» che cumparan quels gis. Ina innovaziun ei gl’album sin pupi. Igl ei buc in «booklet» ligiau e confecziunau. Il plaid engles «Paper Tracks» circumscriva ils biebein 30 fegls libers cul register, texts e grafica. Ina fuorma nunconvenziunala cun differentas scartiras e lungatgs. «Sche ti fas in cudisch, ni in disc cumpact, fixeschas ti enzatgei. Quei cheu ei liber ed a disposiziun individuala», declara l’artista.

«Quei pupi duei viver», explichescha Astrid Alexandre. Gl’album cullas diesch canzuns consista da biebein 30 fegls el format quadratic, da differenta qualitad, fins e pli gross. Ins sfeglia buca sco usitau en in carnet, mobein tegn enta maun mintga fegl individualmein, ins mira, teidla, legia.

Las canzuns sils fegls san ins scargar cun in code. Il manifest per las artistas ed ils artists ell’introducziun da «Resonanzas» finescha Astrid Alexandre cun suandontas lingias:

Senza artist:as gira il mund secapescha vinavon. El cuntinuescha denton senza resun.

Cun els raquenta il mund sia historia.

Cun ellas sedamonda quel.

E mintgaton, mo mintgaton, empren el da respirar autruisa.