Hotels van, hotels vegnan

«Gie, ei constat, a Flem ei la cuntrada da hotels suttamessa actualmein a midadas cun entginas enzennas da damonda», conferma Christoph Schmidt. Il president communal da Flem ei sil current en connex culla hotellaria da Flem. Ensemen cun sia consorta Sandra meina el, en quarta generaziun, il hotel Schweizerhof. Quella casa amiez Flem Casa d’Uaul ei in monolit ferm e stateivel ella cuntrada da casas d’albiert. Divers hotels ein numnadamein confruntai cun reglar la successiun, s’orientar da niev ed encurir la via el futur. Il hotel Albana han ins scarpau giu dacuort, pil hotel Miraval ei in project da baghegiar en vesta. E tier treis auters hotels privats, il hotel Cresta, il hotel Vorab ed il hotel Bellevue, ein midadas da generaziun en vesta. Sch’ei gartegia buca da tener il menaschi en famiglia, vegn quel previsiblamein en vendita.

Definiu ina zona da hotel

Avon 25 onns ha la hotellaria ellas muntognas entschiet a sededicar – paradoxamein – alla parahotellaria. Ils hoteliers privats da Flem san ins cumparegliar cun purs ni auters interprendiders. «Mintga famiglia da purs vegn enzacu al tierm ch’igl ei da surdar il menaschi e reglar la successiun», manegia Christoph Schmidt. Quei ei cumbinau cun finanzas e cumpensaziuns. Quei ch’il pur saveva buca far cun sia stalla, ha il hotelier saviu far cun siu hotel: baghegiar habitaziuns, vender quellas e viver dalla rendita. Suenter il concuors dalla societad dil Parkhotel Waldhaus e la vendita da quel ad ina societad americana la vischnaunca da Flem priu mesiras per impedir che aunc dapli letgs da hotel mondien a piarder. A Flem Casa d’Uaul ha la planisaziun locala definiu ina zona da hotel, ed en quella eis ei buca lubiu da transformar stanzas da hotel en habitaziuns da vacanzas.

Il hotel Schweizerhof dalla famiglia Schmidt ei inclus en quella zona nova. Aschia savess quella buca semplamein serrar il hotel e far ordlunder habitaziuns da vacanzas. Medemamein ei la famiglia dil hotel Cresta pertuccada dalla mesira encunter la muria da hotels a Flem. Treis auters a Flem Vitg astgan perencunter trer a néz quei instrument: Il hotel Albana han ins spazzau dacuort. El vegn reconstruius cun ina part habitaziuns administradas. Era ils hotels privats Vorab e Bellevue ein al spartavias e confruntai cun midadas da generaziun. Ils possessurs in buca suttamess ad ina zona da hotel. Las famiglias astgan transformar combras en habitaziuns administradas.

Hotels privats e hotels da cadeina

Ina casa da gronda tradiziun ch’ei stada confruntada ils davos onns cun midadas da possess ei il hotel Adula. El ei ella zona da hotel e sto mantener la purschida da hotel. Sco quei che Christoph Schmidt remarca en discuors culla FMR, ha el gronda fidonza el futur da quei menaschi. El numna era il motiv: «Las premissas dils possessurs ein bunas. Il hotel Adula fa part dalla gruppa Victoria Jungfrau Collection digl investur Michel Reybier.» Quella posseda aunc auters hotels da luxus cun liunga tradiziun, il Bellevue Palace a Berna, il Palace a Lucerna, igl Eden au Lac a Turitg ed il Victoria-Jungfrau Grand Hotel & Spa ad Interlaken.

Era in auter hotel da tradiziun a Flem Casa d’Uaul, il Surselva, ha giu ils davos decennis entginas midadas. Oz s’auda el alla cadeina Intersoc. Igl ei la cassa da malsauns belgesa che porscha a ses commembers vacanzas ellas Alps svizras. Enstagl dad ir a Mustér el hotel Acla da Fontauna san ils commembers guder a Flem la purschida dil hotel Surselva.

Ella proxima vischinonza da quel ei il hotel Schweizerhof che la famiglia Schmidt meina en quarta generaziun dapi 1905. Fa Christoph Schmidt buca quitaus pervia dil futur? Sil pli tard en 15 onns ei era sia famiglia confruntada culla damonda da reglar la successiun. Co vesa el la cuntinuitad da quei «monolit turistic» ferm e stateivel? «Nus sespruein el mintgagi da dar vinavon a nos affons la relaziun, il connex ed ils aspects positivs dalla hotellaria», rispunda el era per sia consorta. El ei pertscharts che buca in dils quater affons duei esser sfurzaus da surprender il hotel ella tschunavla generaziun.