Biars accidents – cuntermesiras buca necessarias
In tschancun dil stradun digl Alpsu en Surselva ei savens ellas novitads dalla Polizia cantunala. Aschia avon in’jamna. La via H19 denter Laax e Schluein ei stada serrada per quater uras e mesa pervia d’in accident spectacular cun in bus e treis autos da persunas. Igl ei in da numerus accidents. La FMR ha dumandau la Polizia cantunala tgei ch’ella prevedi da far en vesta alla situaziun sin quei tschancun.
Il stradun digl Alpsu ei in’impurtont ischel dil traffic grischun. Sil tschancun nunsurveseivel e stretg denter Laax e Schluein schabegian adina puspei accidents. Quei fatg conferman ils numerus rapports dalla Polizia cantunala. Pli che diesch communicaziuns d’accidents anfl’ins sch’ins consultescha gl’archiv dils davos onns.
Las stortas prigulusas
Ellas stortas sut la sortida Laax astgan ils automobilists carrar cun spertadad 80 en direcziun Schluein. Malgrad via stretga e cun numerusas stortas. En sias communicaziuns rapporta la polizia per exempel: «Unmittelbar nach der Abzweigung Sagogn, in der sogenannten ‘Fletg-Kurve’, in einer unübersichtlichen Rechtskurve» ni «am Ende einer Linkskurve verlor der Automoblist die Herrschaft über sein Gefährt». Cuntinuadamein schabegian tals accidents sin quei tschancun dalla H19.
Il davos ei schabegiaus sonda, ils 28 da zercladur 2026, e la Polizia cantunala ha puspei inagada rapportau surlunder. Sch’ei dat ina cumulaziun d’accidents en in liug, para ei evident ch’ins preveda cuntermesiras.
Co fuss ei cun reducir il tempo sil tschancun prigulus, dad oz 80 sin 60 km/h denter Laax e Schluein? «Ina reducziun dil tempo ordeifer territori habitau pretenda ch’ei vegni fatg ina damonda corrispundenta», rispunda la Polizia e puntuescha vinavon: «Per saver sbassar la limita dil tempo drova ei plinavon ina expertisa ufficiala che cumprova, sche quella mesira ei necessaria, sch’ella ei conforma agl intent e commensurada, ni sch’ei dat alternativas», rispunda il post da medias dalla Polizia cantunala la damonda dalla FMR. Concretamein stoppi l’expertisa sclarir, sch’ei detti effectivamein deficits objectivs sil tschancun dalla via. Mesiras alternativas hagien da principi precedenza avon che decretar ina reducziun dalla spertadad, scriva la polizia vinavon alla FMR.
Ei druvass l’expertisa
Tenor in giudicament dalla partiziun tecnica da traffic dalla Polizia cantunala hagi il tschancun pertuccau dalla H19 negin deficit che giustificass da sbassar la limita per exempel dad 80 giu sin 60 km/h. Per evaluar e cumprovar il cuntrari duvrassi ei l’expertisa, declara la polizia.
Ch’il stradun digl Alpsu H19 ei prigulus sil tschancun denter Laax e Schluein lai la Polizia pia buca valer senza quei giudicament scientific. Sch’ei detti tonaton mesiras a cuorta vesta per evitar accidents stradals en quellas stortas, ha la FMR vuliu saver. «Sin quei tschancun enconuschein nus negins accents d’accident (‹Unfallschwerpunkte USP›). Sche tals USPs mauncan, eis ei grev da motivar e realisar mesiras concretas che fan effect», rispunda il post da communicaziun dalla Polizia cantunala.
Daco buca signalisaziun 60 km/h?
Buca per nuot planisescha il Cantun da sanar e slargiar il tschancun pertuccau atras il territori Gonda sur Sagogn. Entochen ch’il project ei semtgaus e sa vegnir realisaus cuoza ei denton aunc entgins onns. Fuss la tabla culla limita 60 km/h pia buca ina mesira efficienta da prevegnir ad accidents? «Ina evaluaziun dils accidents dils davos treis onns sil tschancun pertuccau muossa ch’ina signalisaziun da 60 km/h havess saviu evitar ni neutralisar gl’accident en buca in dils cass», rispunda la Polizia. L’evaluaziun dils accidents registrai hagien plitost mussau ch’ils automobilists hagien buca adattau la spertadad allas relaziuns actualas dalla via, per exempel cun neiv ni cun respectar la lingia marcada dalla via.
Tals motivs stettien buca en connex direct culla limita da spertadad signalisada. Getg cun auters plaids fussi tempo 60 km/h era staus – els cass schabegiai – memia aults e buca adattau allas relaziuns. «Ina reducziun dil tempo sin quei tschancun purtass previsiblamein negina plivalur relevanta per la segirtad», giudichescha la Polizia cantunala.
Dameins accidents cun controllas da radar?
Ella legislaziun da traffic vala la regla tenor la quala ils automobilists ston adattar la spertadad allas relaziuns dalla via, dil traffic e dalla vesida. «Ina signalisaziun 60 km/h impedess buca da maniera effizienta in accident, metta la Polizia el clar. Quei fagessen denton controllas da radar che sforzan ils automobilists d’adattar la spertadad allas relaziuns. Daco montesch’ins buca in tal apparat stabel sin quei tschancun prigulus? La Polizia repeta sia opiniun e siu giudicament: «Sin quei tschancun eis ei plitost da rar ch’ils automobilists surpassan la spertadad lubida. Cunzun ils radius dallas stortas limiteschan da carrar il tempo signalisau dad 80 km/h. Aschia ch’igl ei strusch da spitgar ch’enzatgi carreschi memia spert.»
Il post da communicaziun dalla Polizia cantunala trai ina conclusiun e finescha: «Decisiva ei la regla fundamentala tenor artechel 32 alinea 1 dalla Lescha federala da traffic tenor la quala ils automobilists ston adina adattar la spertadad allas relaziuns dalla via, alla situaziun dil traffic e dalla vesida». Pia, a cuorta vesta vegn ei a dar sil stradun digl Alpsu denter Laax e Schluein ni ina limita da spertadad ni radars regulars ni autras mesiras. Ad automobilistas ed automobilsts resta nuot auter che da carrar precautamein.
Gust da leger dapli?