Update per tgietschen

Carta Cotschna™ Classic

Dapi 1970. Cumprovada. Fideivla.

Engraziel fetg che Vus essas sedecidi per la Carta Cotschna™ Classic. Duront decennis ha quei product procurau per mesiras e decisiuns claras el ballapei. Sia sempla applicaziun e siu effect immediat han schau daventar ella indispensabla en mintga giug.

Metter en funcziun

• Prender la carta ord il sac dil pèz.
• Stender ora il bratsch cumpleinamein.
• Tener si bein veseivla la carta.
• Mussar sil giugadur pertuccau.

La participaziun al giug current finescha per immediat.

Reacziuns enconuschentas

Il giugadur recloma.

• Il trenader recloma.
• Il publicum recloma.
• Experts da televisiun discuteschan tochen tard viaden ella notg.

Quellas reacziuns ein normalas e muntan buc in sbagl dil product.

Manteniment

La Carta Cotschna™ Classic drova negin manteniment. Ella drova ni updates da software ni sincronisaziuns da cloud. Ella pren ina decisiun. Dapli buc.

Cumpatibladad

Cumpatibel cun:

• arbiters
• plazzas da ballapei
• interrupziuns dil giug

Buca cumpatibel cun:

• contractivas posteriuras
• communicaziun da crisa
• management d’influenza
• cadeinas da telefon

Interrupziun dalla producziun

La producziun dalla Carta Cotschna™ Classic ei vegnida sistida. Buca muort raschuns tecnicas. Mobein perquei ch’il product ademplescha buca pli las pretensiuns d’ozildi.

Niev en vendita

Carta Cotschna™ Pro+

Per applicaders, als quals decisiuns finalas ein memia definitivas.

Novas funcziuns

• opziun da telefonar
• interpretaziun dinamica dallas reglas
• sincronisaziun live cun tuttas persunas che decidan
• over-the-air-updates duront il giug
• lingia directa per contacts specialmein impurtonts
• management da decisiuns en temps real

Opziunalmein da retrer

Carta Cotschna™ Pro+ Max

Recumandau per concurrenzas internaziunalas. Cun modus da reit slargada e transmissiun directa.

Premissas da sistem

• reit per telefonia mobila
• silmeins ina numera da telefon cun influenza
• grad d’enconuschientscha sufficient

Remarca dil producent

Tut tenor influenza, grad d’enconuschientscha e reit san funcziunaris variar.

Il producent fa denton attent che quei update stat en negin connex cul cass entuorn il telefon da Donald Trump ed il president dalla FIFA Gianni Infantino. Secapescha buc.