Martin Capeder vul daventar president communal
Martin Capeder, il vicepresident da la vischnaunca dad Ilanz/Glion, candidescha sco successur da Marcus Beer che ha demissiunau sco president
da vischnaunca per motivs da sanadad silla fin da quest onn. La candidatura da Martin Capeder ei l’emprema per las elecziuns dils 27 da settember 2026.
Igl independent Martin Capeder ha 49 onns. El ei carschius si a Castrisch e viva cun sia famiglia a Duin. Sco vicepresident da la vischnaunca dad Ilanz/Glion ha Martin Capeder substituiu la primavera vargada il president Marcus Beer duront treis meins.
Gia alla fin da quella perioda haveva Martin Capeder detg enviers la FMR che la substituziun seigi stada ina experientscha positiva per el (la FMR ha rapportau ils 3 da matg 2026). Ussa ha el decidiu da candidar: «Jeu haiel gest inoltrau mia candidatura tier la canzlia Ilanz/Glion e fuss fetg motivaus da surprender il presidi da nossa vischnaunca.»
Naven da 2009 entochen alla fusiun igl onn 2014 ha Martin Capeder presidiau la vischnaunca da Duin. Silsuenter eis el staus commember dil parlament dad Ilanz/Glion e naven digl 1. da schaner 2023 fa el part dalla suprastonza communala.
Quinter ha buca queidas
«Per mei persunalmein vegn ei plitost buc en damonda da candidar pil presidi dalla vischnaunca dad Ilanz/Glion», di igl interprendider d’immobilias Claudio Quinter che appartegn al Center sin damonda dalla FMR.«Jeu haiel interpresas che marschan bein e sun ussa en in’autra responsabladad professiunala ch’igl onn 2022 ch’jeu haiel candidau l’emprema gada pil presidi.» Avon quater onns haveva Claudio Quinter spiars 95 vuschs sin Marcus Beer, aschia che lez ei staus eligius sco president communal. Claudio Quinter: «Leu hai jeu candidau ed havess aunc saviu sedistaccar bein da mias fatschentas. Mo ussa va quei buca pli.»
Dietrich vul era buca pli
Circa ella medema crena sco Claudio Quinter dat era Silvio Dietrich dalla Partida socialdemocrata (PS). Sco Claudio Quinter ei era el staus candidat pil presidi gia avon quater onns. Silvio Dietrich ha detg ch’el seigi vegnius dumandaus ussa da pliras varts, sch’el candideschi aunc inagada pil presidi da vischnaunca: «Jeu sun staus inagada a disposiziun avon quater onns. Da lezzas uras sun jeu buca vegnius eligius. Jeu saiel viver cun quella decisiun da nossas votantas e votants. Jeu haiel tuttavia buca spitgau silla caschun da candidar aunc inagada.» Tenor Silvio Dietrich vul la PS prender la peda ch’ella drova per ponderar, sch’ins vul ir cun ina candidata ni in candidat ella cuorsa electorala.
Il secund num che fa la currella ad Ilanz/Glion ei quel dalla socialdemocrata Michal Hohl ch’ei dapresent era suprastonta communala. Ella ei muort vacanzas buca stada contonschibla per ina posiziun.
Campagna electorala en vacanzas
Ils presidents dallas partidas localas dad Ilanz/Glion e dalla Surselva ein stai plitost reservai cun numnar candidatas e candidats. Uolf Candrian che presidiescha la secziun sursilvana dalla PS ha detg sin damonda dalla FMR che la nominaziun d’ina candidata ni d’in candidat seigi aunc buca stada in tema en sia secziun. «Nus mirein ussa tgi che candidescha e decidin lu vinavon.»
Negin uffeci tschercau
La Partida liberaldemocratica dalla Surselva ha negin che vul ir els stadals pil presidi dad Ilanz/Glion. Il president dalla partida, Hanspeter Bundi, ha fatg da saver ch’ins hagi fatg ina emprema discussiun ella suprastonza, mo ch’igl interess seigi plitost pigns. Quei entochen tier ina persuna che hagi aunc buca saviu sedecider. Il num da quella persuna ha el denton buca vuliu numnar.
Era tier il Center ei la campagna electorala aunc buca tema. Claudio Quinter, il president dalla partida ha detg enviers la FMR ch’ins vegni proximamein a discutar, sch’ins vegli separticipar cun ina candidata ni cun in candidat alla elecziun dil niev president communal.
L’elecziun dil presidi dad Ilanz/Glion ha liug ils 27 da settember 2026. Il niev president u la nova presidenta entra en uffeci igl 1. da schaner 2027.
Gust da leger dapli?