Goldmann sco «scazi» en in auter liug
«Scazi by Goldmann». Aschia senumna la stizun cun patissaria e paun, cumbinada cun in caffè che vegn aviarta la fin digl onn el center dil vitg da Mustér. Ella vegn endrizzada el plaunterren da La Centrala – la centrala da latg da pli baul. Aschia dat ei era igl avegnir ina purschida da patissaria e confisaria sin empustaziun sisum la Surselva.
Il mars vargau han Toni e Renata Goldmann communicau ch’els siarien lur pasternaria ils 24 d’october 2026. 34 onns han els menau l’interpresa amiez il vitg da Mustér. Ina successiun ei buca sepurschida, mo ussa duei ei tonaton dar ina tala, silmeins per ina part. Renata Goldmann, Rita Schuoler e Daniela Lutz ch’ein engaschadas tuttas ella producziun, ella stizun ni il caffè da Goldmann ein sedecididas da cuntinuar cun ina semeglionta purschida sco entochen dacheu en in auter liug el vitg. Il baghetg el liug nua che la pasternaria sesanfla oz vegn spazzaus. Leu vegn erigiu ina surbaghegiada cun endisch habitaziuns (mira box).
Stizun e caffè
La stizun nova el plaunterren da La Centrala – la centrala da latg da pli baul – alla Via Lucmagn a Mustér vegn numnada «Scazi by Goldmann». Cun quei num vulan las treis dunnas cuntinuar silmeins en ina fuorma culla pasternaria e conditoria Goldmann ch’ei s’etablida sur treis generaziuns. La stizun cumbinada cun in caffè vegn aviarta l’jamna denter Nadal e Daniev 2026. Il local el plaunterren da La Centrala ha dil reminent gia surviu sco ustria pli baul duront in temps.
Atgna patissaria
«Nus purschin products da paun, sandwiches e patissaria. Il paun vegn furnius dalla Pasternaria Gabriel da Breil, la patissaria producin nus sezs. Daniela Lutz ei da professiun conditra», di Renata Goldmann e declara: «Il motiv principal da nies engaschament ei da porscher era igl avegnir a nossa glieud la pusseivladad d’empustar ina tuorta da natalezi ni in dessert per ina fiasta. Sche nus fagein buca quei, lu fa negin quei denter Sedrun e Glion.» Ina part dalla purschida dallas treis dunnas ein era aperos e catering.
Paun dalla regiun
Il menaschi duei esser aviarts mintgamai dil mardis entochen la sonda. «Nossa purschida duei er esser ina contribuziun alla veta el vitg. Culla stizun ed il caffè lein nus – sper tut quei ch’ei gia el vitg – ch’ei marschi zatgei.» Cun retrer il paun d’in pasterner dalla regiun veglien ins products da cheu. «Nus havessen era l’alternativa da retrer quels products d’in furnitur grond e lu da metter quels cheu en in fuorn per la producziun finala. Quei lein nus denton buc», puntuescha Renata Goldmann.
La davosa confisaria
Cura che la pasternaria Goldmann a Mustér siara si’escha ils 24 d’october 2026 sesiara il cerchel dils menaschis da pasternaria e confisaria tradiziunals a Mustér. 1993 deva ei aunc treis pasterners a Mustér. Sper Goldmann era quei era quellas dallas famiglias Herger e Monn. Cun endrizzar ina confisaria e vendita da paun en La Centrala amiez il vitg resta silmeins ina part da quella branscha mantenida a Mustér.
Surbaghegiada cun endisch habitaziuns
Amiez il vitg da Mustér, el liug nua ch’il baghetg dalla Pasternaria Goldmann sesanfla oz, vegn construiu ina nova surbaghegiada cul num Casa Aurum. Il baghetg vegl vegn spazzaus. Tut en tut vegn erigiu endisch habitaziuns, da quei quater cul dretg da secunda habitaziun. La surbaghegiada porscha habitaziuns cun ina grondezia da 2 ½ entochen 4 ½ stanzas. Quels dis ei l’annunzia da baghegiar persuenter vegnida inoltrada alla vischnaunca da Mustér. La finamira ei da saver entscheiver culla construcziun dalla casa la primavera 2027. El decuors digl onn 2028 duessen las habitaziuns esser finidas e promtas pils possessurs ni locataris. (fmr/hh)
Gust da leger dapli?