Il glatsch da Mustér vegn sanaus

Il suveran da Mustér vul schar sanar la patinera artificiala dil Center Fontauna. Ier dumengia han 56 % dils votants e votantas getg GIE all’iniziativa corrispundenta. Quella han ils iniziants lantschau ils 17 da zercladur 2026, suenter ch’il cussegl communal veva refusau questa primavera il credit dad 1,1 milliuns francs per realisar la sanaziun necessaria. Quei vess denton giu per consequenza che la patinera stuess vegnir serrada.

E sco las cefras dalla votaziun da stad muossan, ei il glatsch d’unviern buca mo staus in tema tiels iniziants. Cun 46,7 % ei la participaziun dalla populaziun numnadamein stada pulit aulta, aschia il president communal René Epp enviers la FMR: «Il tema ha guess muentau la populaziun. Tier ina singula votaziun communala miez fenadur duront il temps da vacanzas ei la participaziun stada dètg aulta. Quei vess jeu buca spitgau.» La finala han 690 da 1476 persunas cun dretg da votar dau giu il cedel all’urna. Da las vuschs valeivlas ein 384 stadas per l’iniziativa e 298 encunter.

Pils affons, malgrad ils cuosts

Buca diltut surstaus dalla participaziun aulta ei perencunter il cun-iniziant Bruno Flepp staus. «Nus vein schon empruau da mobilisar la glieud, cunzun via WhatsApp. Mo quei han era ils adversaris dall’iniziativa fatg», ha el detg sin damonda dalla FMR. Ed ussa ch’in GIE ei seresultaus, selegra el en emprema lingia che la patinera restia pils affons. Capientscha per ils arguments dils adversaris ha Bruno Flepp tuttina: «A Mustér dat ei in pèr projects pli gronds. Perquei pon las finanzas schon far quitaus. Mo ils daners per la patinera ein buca sfarlatai. Pertgei ei vegn adabien als affons.»

D’in auter avis ei ferton il cussegl communal staus, sco Theres Burri Gadola, la presidenta dil cussegl, veva detg enviers la FMR la jamna vargada («La Quotidiana» dils 8 da fenadur 2026): «Investar varga in milliun francs per ina patinera che sa vegnir nezegiada maximalmein treis meins ad onn e che caschuna cuosts annuals da rodund 100 000 francs ei per la maioritad dil cussegl da vischnaunca negina investiziun persistenta.» Schegie che la maioritad all’urna ei stada d’in auter avis, muossa il resultat tuttina che las finanzas ein tier rodund 44 % dallas votantas e votants probablamein in tema. Theres Burri Gadola ei dil reminent buca stada contonschibla avon la fin da redacziun ed ha perquei buca saviu prender posiziun davart il resultat.

In glatsch era l’unviern 2026/27

Sco René Epp ha confirmau, vegni la patinera sanada el decuors digl atun. «Nus vein aposta realisau la votaziun aschi spert sco pusseivel, per che nus sappien en cass d’in GIE aunc sanar la patinera ad uras, vul dir per la sesiun d’unviern 2026/27», aschia il president communal. La patinera a Mustér vegn denton buca mo sanada. En connex cun quellas lavurs vegn la surfatscha era reducida per rodund 20 %.