Dus travagls impurtants per la regiun

La Garascha Sigron SA e la Sigron Transport SA a Vaz èn en exaimpel per en affar da famiglia cun success. Igls dus menaschis pitschens – dus «KMU» – on ena tradiziun da 72 onns ed èn economicamaintg da gronda muntada per la regiun. Mano vign igl travagl da famiglia gio dalla terza generaziun. Igls dus menaschis dallas famiglias Sigron èn interpresas fidadas, innovativas e modernas.

Dus novs manaders da partiziun

Igl de dallas portas avertas bagn frequento da sonda passada è er sto l’occasiun da preschentar igls dus novs manaders da partiziun alla clientella. Gabriele Tippo segna da nov tar la Garascha Sigron SA scu manader da partiziun digl menaschi e Luca Gasser è responsabel per la partiziun maschinas agricolas. Gabriele Tippo dereiva da Basilea, canoscha la regiun ed è pigl mument anc da tgesa a Lai scu dimorant dall’emda. Luca Gasser è sesent a Haldenstein e peglia gugent an compra igl viadi da lavour quotidian da Haldenstein a Lain. Igls frars Marcel e Norbert Sigron, tg’èn ossa pitost occupos ainten la sagonda retscha dall’interpresa da famiglia, èn anc adegna ena part digl menaschi. Els dus on plascheir d’aveir catto cun Gabriele Tippo e Luca Gasser dus persungas digl rom pigl menaschi da famiglia. Fabian Sigron, igl junior, segna per la direcziun dalla Sigron Transport SA.

Radond 20 ampluias durant igl antier onn

La Garascha Sigron SA porscha ena massa sarvetschs per vehichels da persungas e maschinas agricolas. Ultra da chegl è igl menaschi er igl dretg contact per motors ed apparats pitschens. Da nov vign purschia ainten la garascha er igl service per uders idraulics, surtot tals scu accessoris per maschinas agricolas. Agl li vignan chels fatgs sen la lunghezza giavischeida, ò detg Norbert Sigron anvers la FMR. Sies frar Marcel Sigron ò detg tgi l’interpresa da famiglia vegia radond 20 ampluias durant igl antier onn. Igl menaschi da transport occupescha durant igl antier onn dodesch ampluias, la garascha e l’administraziun occupeschan durant igl antier onn set ampluias. Cun chels radond 20 ampluias è igl travagl da famiglia uscheia er en impurtant patrung ainten la regiun. Chegl tgi pertotga la sviouta fò l’interpresa da transport ena sviouta en po pi ota tgi la garascha.

Leasing er per vehichels agricols

Durant la stad èn surtot fitg bleras maschinas agricolas sen veia. En vehichel d’economia da carger, marca Reform, scu exponia igl de dallas portas avertas la davosa sonda a Lain costa cun cargeder radond 230 000 francs, ò rachinto Luca Gasser. Da nov vegia chel vehichel betg angal en dumbrader d’ouras scu usito tar da chels vehichels, mabagn er en dumbrader da kilometers. L’equipaziun dallas maschinas agricolas vigna adegna optimada e sa migliurescha er chegl tgi pertotga igl palar, la forza ed igl travagl, uscheia igl spezialist digl rom. Cun chito e tgira seia en tal vehichel vers 20 onns an funcziun. Norbert Sigron ò menziuno tgi seia er pussebel da piglier a tschains en vehichel agricol.