Andri Gritti vess gnü ün milli gust dal sal e paiver

Il festival da musica «Cun sal e paiver» es gnü organisà a Sent als 10 ed 11 lügl 2026 in algordanza dad Andri Gritti. Tschinch concerts cun musica in differents stils illa baselgia San Lurench e cun restoraziun illa Chasa Misoch han rendü omagi al «bap dal festival».

Andri Gritti cun sia duonna Gianna Bettina Gritti ed amis han pisserà dürant divers ons per arrandschamaints musicals e d’oter gener cultural illa regiun. Ed els han inrichi uschea la vita culturala a Sent e contuorns. Els han eir adüna collavurà culla sporta culturala da la Grotta da cultura ed han organisà prelecziuns, concerts, exposiziuns ed oter plü.

In algordanza da l’organisatur

In schner da quist on es Andri Gritti (1957 – 2026) mort davo lunga malatia. Per s’algordar da quist promotur da cultura regiunala ha gnü gnü lö la fin d’eivna passada «seis» festival da musica «Cun sal e paiver» ch’el svess vaiva miss in pè suot il motto «In algordanza ad Andri». Id ha dat duos concerts in venderdi e trais la sonda illa baselgia San Geer a Sent.

Dürant las posas, tanter ils differents concerts, han ils preschaints e las preschaintas gnü l’occasiun da tour ün süerv ed üna boccada illa bar da la Chasa Misoch. 15 fin 20 musicistas e musicists, chantaduras e chantadurs han pisserà per üna sporta musicala d’ota qualità – da musica populara fin pro’l jazz. Ils concerts sun stats bain visitats ed han rendü ün bel omagi ad Andri Gritti chi s’ha ingaschà cun corp ed orma per üna viva sporta culturala in ed intuorn cumün.

«A family affair» e «C’est si B.O.N.»

In venderdi passà han gnü lö duos concerts chi han dürà minchün var ün’ura. Il prüm concert cul titel «A family affair», cun Miriam Cipriani (flöta a travers) e Stefano Sposetti (clavazin), ha manà tuns loms ed amabels illa baselgia San Lurench.

Il seguond concert dal venderdi culla gruppa «C’est si B.O.N.» ha fat dudir tuns da jazz cun blera ritmica e surpraisas musicalas. Tras il concert ha manà Madlaina Janett. Il public ha dudi musica da different gener, da «La marcha da Barnabà» fin pro ouvras cun sü ün buol da jazz. Las müdadas d’instrumaints han pisserà per gronda variaziun ed in divers tocs s’haja dudi solos da saxofon e perfin dal gïun e dals cellos.

Cun omagi eir per Paulin Nuotclà

Ils musicists da «C’est si B.O.N.» sun stats Barbara Gisler (cello, gïun e chant), Cristina Janett (cello e chant), Curdin Janett (orgel da man, gïun e chant), Madlaina Janett (viola e chant) e Niculin Janett (saxofon e chant). Pro ün toc chantà d’eira eir Sara Bigna Janett da la partida. Las quatter duonnas han chantà üna chanzun tirolaisa cun gronda precisiun ed ardur. Sara Bigna Janett ha lura chantà cun accumpognamaint musical «Das Tragliun» da Paulin Nuotclà, il chantautur barmör. «Schabain cha meis bap, Jachen Janett ha trat il nas da quell’idea, tilla chanta uossa listess», ha la chantadura tradi in venderdi. Cun bler sentimaint ha ella lura chantà amo «Sper il mar», eir da Paulin Nuotclà – accumpagnà il prüm fich dezaintamaing cul orgel da man da Curdin Janett, e pass a pass sun eir pro quella chanzun gnüts pro oters instrumaints. Ün concert cul predicat «no limits» chi ha tratgnü üna baselgia bain implida in möd cumpetent e cun bleras surpraisas.

«Cun cuaida e plaschair»

In sonda vers saira han lura gnü lö trais ulteriurs concerts – ün davo tschel tanter las 17.00 e las 22.00. Ün prüm concert es stat üna producziun cun ün coro cun chantaduras e chantadurs da differents progets e cun accumpagnamaint musical da Curdin Janett, Madlaina Janett, Cristina Janett e Barbara Gisler. Lura es seguida la Schubertiada cun Operetta Ardez – cun musica da Johannes Brahms, Bernstein fin pro Udo Jürgens. Da la partida d’eiran Sara Bigna Janett (sopran), Gianna Lunardi (mezzosopran), Chasper Curò Mani (bariton) e Zoi Tsokanou (clavazin).

L’ultim concert dal festival ha gnü lö a las 21.00 culs Fränzlis da Tschlin cun musica populara tradiziunala da l’Engiadina e «cun cuaida e plaschair» tras tuot ils stils musicals pussibels.

Ils concerts dal festival musical «Cun sal e paiver» sun stats bain visitats ed han preschantà musica per mincha gust da buna qualità. Sainza dubi: Andri Gritti vess gnü «cuaida e plaschair» ed ün milli gust da tuot il sal e paiver.