Tiradours grischuns on miro precis

La Festa federala da teir 2026 a Coira ed ainten 19 oters lis digl Grischun è istorgia. Er ord vista grischuna è ella stada en success. Chegl betg angal per Georg Maurer da Favogn, igl rètg-tiradour, mabagn er per oters tiradours digl Grischun tgi on miro e tutgia precis. Radond 2500 tiradours e tiradouras digl Grischun èn sa participos all’occurrenza da teir naziunala igl zarcladour e fanadour 2026. Igls pi blers participants èn nias digl cantun Berna, en cantun noua tgi igl teir ò anc gronda tradiziun.

Romeo Poltera: plaz 2 da 6000 tiradours

Tratgs èn nias dalla Festa federala da teir sen la distanza da 300 meters diesch stetgs. Chegl mintgamai an treis categorias. La categoria A cun l’arma da sport, la categoria D cun l’arma 57/03 e la categoria E cun l’arma 90.

Ena victorgia dobla pigl Grischun ògl do tigl stetg «uniun» ainten la categoria D. Gudagnea chel stetg ò cugl resultat da 99 puncts, da 100 puncts pussebels, Werner Natter da Tumegl. Er fatg 99 puncts e sto alla testa dalla rangaziun anfignen prest alla fegn dalla festa è Romeo Poltera da Savognin. El è dall’annada 1971 – ed igl victour da chel stetg è dall’annada 1963. Igl è uscheia tgi per la rangaziun è dasper igl resultat er l’annada decisiva. Vot deir tgi igl tiradour pi vigl è ainten la rangaziun adegna rango migler. Per Romeo Poltera è chel sagond post tigl stetg «uniun» egn digls gronds success an sia carriera.

Andrea Stiffler, igl matscheur da Tavo ò gudagnea igl stetg «capricorn» dalla categoria D, en stetg tgi 4344 participants on er tratg. Igl terz victour grischun è Mario Feuerstein da Zuoz cun annada 1956. El è egn digls 45 tiradours tg’on sagetto igl resultat maximal da 60 puncts da total 1779 participants sen chel stetg categoria arma da sport.

Er fatg 60 puncts ed «angal» plaz 46

Tratg chel stetg scu Mario Feuerstein ò er Dario Jäger da Cunter. Igl tiradour è dall’annada 1998 e totga ainten la regiun tar egn digls gronds talents. Cun esser egn digls pi giovens tg’ò er fatg igl maximum da 60 puncts ògl alla fegn finala tanschia per el «angal» per plaz 46 da 1779 participants.

Dasperas Romeo Poltera on anc ulteriours treis tiradours grischuns gia da sa cuntantar cun plaz dus ainten oters stetgs. Chegl èn igl Engiadines Mario Feuerstein, Marco Hassler da Jenins e Beat Rodigari da Puntraschigna.

Tar la rangaziun dallas secziuns ò ainten la categoria da fermezza 2 triumfo la secziun da Sedrun-Tujetsch ena rangaziun cun 440 secziuns. La secziun da Surses è rangada sen plaz 8. Plaz 4 ògl do ainten la categoria da fermezza 4 per l’Uniun da teir Chalavaina.

Igl setg tg’è nia tratg igl pi savens è igl stetg «cranz» cun 12 665 participants e participantas.