«El era simplamain in ‹furbaz›»
Venderdi passà è mort Roland Collombin, l’anteriur skiunz internaziunal. Avant passa 50 onns era il Vallesan commember dal cader da skis svizzer. Ensemen cun Walter Tresch, che stat uss a Lantsch. E lez sa regorda bain dal «enfant terrible» vallesan Roland Collombin.
Bernhard Russi, Walter Tresch e Roland Collombin. Els tutgavan ils onns 1970 tar ils megliers skiunzs da la Svizra. Gea dal mund. Bernhard Russi era per uschè dir il «charin» da la naziun ed il schender da siemi. Walter Tresch era fitg simpatic e plitost il pli quiet. E Roland Collombin era il selvadi che na trenava betg uschè gugent e procurava sin la pista e dasper quella per blera vita e per bleras istorgias.
L’onn 1972, als gieus olimpics a Sapporo, ha il Vallesan Roland Collombin gudagnà en la cursa rapida la medaglia d’argient, tar la victoria da ses ami da squadra Bernhard Russi.
Sch’i vegniva discurrì da quel temp da Roland Collombin, lura na mancava savens betg l’expressiun «enfant terrible». El ha festivà otg victorias en sia carriera en la cuppa mundiala da skis. Tut questas victorias ha el fatg en la disciplina cursa rapida. Tar ses pli gronds triumfs han tranter auter quintà duas victorias a la cursa legendara dal Hahnenkamm a Kitzbühel (1973 e 1974) sco era la victoria a la cursa dal Lauberhorn a Wengen dal 1974.
Venderdi passà è Roland Collombin mort en la vegliadetgna da 75 onns, quai suenter la malsogna maligna cancer. Il defunct è stà cun Walter Tresch en il cader da skis naziunal avant passa 50 onns. E lez sa regorda bain da ses ami d’equipa. Walter Tresch stat a Lantsch. La FMR ha gì chaschun da discurrer cun el en connex cun la mort da Roland Collombin.
FMR: Co avais Vus udì da la mort da Roland Collombin?
Walter Tresch: Da mes anteriurs amis da skis che sa numnan «Skifritzen».
Avevas Vus anc adina contact cun Roland Collombin?
El è adina stà giast regular tar mes turniers da charity da golf da la fundaziun da sport Walter Tresch ad Andermatt Realp, dal 2003 fin il 2023. Là avain nus adina rimnà daners per la generaziun giuvna da skis e dal sport uranais.
Tar ina producziun dad Origen avais Vus ina giada raquintà che la veglia garda dals skiunzs internaziunals s’entaupa adina puspè. È quai uschia?
La garda veglia da skis che sa numna «Skifritzen» s’entaupa mintga dus onns en in’autra regiun per ir cun skis. L’onn passà essan nus stads ad Arosa, l’onn proxim giain nus ad Adelboden. Organisà vegn l’inscunter adina d’anteriurs skiunzs internaziunals da quella regiun. Nus essan era gia stads ad Andermatt e Bristen, la patria da Bernhard Russi e da mai.
Sco commember dal cader da Swiss Ski è Roland Collombin bain stà spezial?
El è stà spezial, dotà cun in umor welsch, ed el ha gì fitg grond success en sia curta carriera. El gieva per il pli sia atgna via, quai che na fascheva betg simpel per l’equipa ed il trenader. El era ina persuna plain vita.
Sco uman e camarat franc in bun tip?
El era adina amiaivel, colleghial e da buna luna, simplamain in «furbaz» ch’era grev da metter a mastrin e da giustar.
Roland Collombin trenava pli probabel pli pauc che Vus e che Bernhard Russi, che eras era cun el en ils caders da skis naziunals?
Quai na pon ins betg laschar star uschia. Mintgatant ha el ditg adia cura che nus trenavan cun ils pleds: «J’ai mal au dos», ma malgrà quel «mal il dies», ha el dentant trenà a chasa sulet e sco ch’i para betg pauc. Sche tuts avessan fatg quai uschia, fiss quai stà desolat per ina squadra.
Avais Vus intginas regurdientschas spezialas dad el?
Cura che Roland Collombin ha gudagnà il 1974 la cursa da «Hahnenkamm» a Kitzbühel al hai jau purtà enturn sin las spatlas en il final, sin quai avess jau renunzià pli gugent cun ses prest 100 kg! Qua hai jau simplamain sutvalità ses pais! In’autra istorgia è capitada tar in’observaziun da tschiervs da notg a Sta. Maria en la Val Müstair. Nus eran en il trenament da skis sin il Stelvio e Roland ha prest fatg ir en muschna in Ford Escort novischem ch’el aveva duvrà tar questa observaziun.
Tge resta a Vus en meglra memoria da Voss ami Roland Collombin?
Nus avain ris fitg bler cun el, avain dentant era savì ans sgnervar magari pervi da ses cumportament. Ses umor welsch era halt simplamain in pau auter. Suenter sia carriera da skis è el sa preschentà pli savens sco martgadant da vin en la Svizra tudestga per furnir vin a ses amis e clients. Jau al vegn adina a tegnair en meglra, positiva, amicabla e bella regurdientscha, ed jau sun en patratgs tar el e sia famiglia.
Gust da leger dapli?