Il festival familiar

Ils 10 ed ils 11 da fenadur 2026 ha la tschunavla ediziun dil Buatsch Festival giu liug a Tersnaus en Lumnezia. Duront quels dus dis ei la fracziun da Suraua stada cargada e decorada cun tribunas, stans da vivonda e naturalmein cun ils hosps ch’ein derivonts da tut il mund. Sch’ins mava per las vias, udevan ins la glieud a tschintschar romontsch, tudestg, engles e schizun spagnol.

Organisaus vegn il Buatsch Festival mintgamai dall’Uniun Lidimer. Il president dall’uniun Leander Albin ha priu peda la sonda vargada per discuorer cun la FMR duront il festival. Igl indigen ha gest l’entschatta dau da capir: «Il tetel da president hai jeu mo per che la vischnaunca hagi ina persuna da contact. Noss’uniun ha en quei senn negina hierarchia. Nus essan tuts tuttina.»

In connex puril

Tredisch persunas hagien organisau il Buatsch Festival, il festival che ha in num empau nunusitau. «Il plaid buatsch ei adina igl emprem che vegn daus vinavon da miu bab a glieud che sa buca romontsch», ha getg Leander Albin. Ei seigi in plaid che vesi ora aschia sco quei ch’el tuni. Il festival hagi era num aschia perquei ch’el hagi in connex puril.

La gronda part dil program da festival ei stada la musica. La principala dallas quater tribunas era quella ella stalla dils geniturs da Leander Albin. Pli datier alla veta purila savevan ins pia gnanc esser. Musica vegneva ei era fatg denter las casas dil vitg, en ina jurta baghegiada per il Buatsch Festival ed ella baselgia. Leander Albin ha raquintau: «Jeu hai propi plascher che la pleiv ha lubiu a nus da far diever dalla baselgia per far musica. Ils responsabels eran tuts aschi curteseivels.» Era ils habitonts da Tersnaus reclomien buca pervia dalla canera. Els seigien cuntents ch’ei marschi enzatgei el vitg.

Different agl Openair Lumnezia

«Quei onn havein nus entuorn 450 hosps. Jeu teness ei bugen tier quella quantitad, sche buca schizun pli pauc», ha Leander Albin getg la sonda sera. Il Buatsch Festival sedifferenziescha denton buca mo pervia da quei diember dil grond Openair Lumnezia che vegn organisaus sin tschella vart dalla vallada. Sin il program stat buca mo musica, mobein era tscheinas communablas, workshops, referats e quei onn ina discussiun da podi davart secundas habitaziuns.

Special tier il Buatsch Festival ei era la lavur voluntara. Tier l’entrada ha mintga visitadra e visitader la pusseivladad da s’enscriver sin la gliesta da lavurs. «Senza igl agid dils voluntaris funcziunass nuot tier nies festival. La glieud ei denton fetg segideivla, aschia che quei funcziuna mintg’onn senza problems», ha Leander Albin getg.

Argentina rebatta la vallada

In punct culminont dil Buatsch Festival ei staus il concert dalla band argentina «Chocolate Remix». Cun ses raps spagnols ha l’artista Romina Bernardo fatg siglir ils aspectaturs e las aspectaturas tochen tard ella notg. «Nus havein aunc mai giu in’artista aschi enconuschenta al Buatsch Festival. Ella ha propi animau la glieud», ha Leander Albin raquintau.

Sper la sensaziun dall’Argentina ha il Buatsch Festival era dau la pusseivladad ad ina nova artista da semussar. La cantadura KLOé da Losanna ha aunc mai fatg musica sin ina tribuna. «Nus empruein mintg’onn da haver in’artista ni in artist da resca. Quei onn ei quei stau la KLOé. La musica ei denton bellezia», ha Leander Albin getg duront secumblidar ella musica ruasseivla. Tut en tut seigi el pli che cuntents cun la tschunavla ediziun dil Buatsch Festival.