«La cruna per nies engaschi»

Igl emprem da fenadur 2020 ha La Conditoria Sedrun Switzerland aviert siu baghetg da producziun niev. «Nus eran amiez corona. Mo corona ei buca stau il sulet che ha fatschentau nus dapi l’avertura dil menaschi», di Reto Schmid (51). Mo el ha teniu la dira, ei viagiaus pil mund entuorn ed empustiu impurtonts contacts. En 13 tiaras ha el furniu ni furnescha ses products ed ussa era en Germania. «Per la stagiun da Nadal savein nus furnir leu products ad in detaglist cun 5000 stizuns. Ils aspects che nus sappien producir vinavon per quei client ein fetg buns», di il Tuatschin. Quell’incarica cumpensescha quella ch’era previda oriundamein cun Costco els Stadis Uni dall’America. Che gliez deal seigi buca reussius seigi d’attribuir alla problematica dalla politica da dazi dils Stadis Uni dall’America.

Milliuns tuortas da nuschs

Dalla dimensiun dalla furniziun en Germania vul Reto Schmid buca tradir la massa era buca davart il num dil detaglist grond, mo el di: «Igl ei melli palets cun plirs milliuns tuortas da nuschs pintgas, mo era tuortas pintgas cun autras ingredienzas. Quella empustaziun ei fetg relevonta pil success da nies menaschi. Igl ei aschidadir la cruna per nies engaschi.» Al medem detaglist sappi La Conditoria Sedrun Switzerland era offerir differents products stagiunals, per exempel per Pastgas, s. Valentin ni il di dalla mumma. «Nus essan il sulet furnitur svizzer da quei detaglist ed jeu sai da bunas fontaunas che quei detaglist ei fetg fideivels a ses furniturs», puntuescha Reto Schmid. La Germania seigi interessanta era ord vesta dall’inflaziun che seigi leu il mument sil nivel da rodund 10 %. En cumparegliaziun cun in’inflaziun da 2 ni 3 % en Svizra sedetti aschia in prezi psicologicamein attractiv. Dalla Germania detti ei aunc in auter interessent per ses products.

Fetg bia lavur

«Nus essan il mument al cunfin da nossas capacitads», di Reto Schmid. Spel baghetg aviarts 2020 sa el nezegiar uss in grond baghetg da scrinaria gest dasperas sco magasin. Mo era quel ei gia pleins pli che pleins cun material e products. Quest meins producescha il menaschi 2,5 milliuns tuortas pintgas. Parallelamein marschan gia las preparativas per Nadal e lu beinspert era per Pastgas. «Igl onn vargau havein nus produciu in miez milliun lieurs da tschugalata. Per las Pastgas vegnentas vegn ei ad esser aunc pli biaras. Nus havein sviluppau successivamein novs models da lieurs, denter auter era sin giavischs specials dalla clientella.» Products da tschugalata ein daventai in’impurtonta petga dil menaschi e per puder dar il damogn a quellas incaricas vegn la pasternaria veglia era a survir per quei intent igl avegnir. Cun 50 collaboraturas e collaboraturs ei La Conditoria Sedrun Switzerland in menaschi surveseivel e quei vesa Reto Schmid sco avantatg: «Grazia all’infrastructura e las maschinas che nus havein installau, savein nus risguardar era giavischs individuals da nossa clientella.»

Disavantatg ed avantatg dil liug

«99,5 % dalla sviulta che nus fagein oz fagevan nus buca avon diesch onns», relata Reto Schmid. E sch’ei va tenor sia veglia, duei il menaschi crescher vinavon. El crei buca mo en sia filosofia cun products innovativs ed interessants, mobein era el liug sisum la Surselva: «Nus havein in disavantatg pertuccont il liug da producziun, mo da l’autra vart savein nus nezegiar quel pil marketing. Bia glieud ei surstada udend che nus produceschien si els cuolms. Nus savein raquintar interessantas historias dalla regiun culla Tgina dil Rein e da nies menaschi sin 1400 meters sur mar.»

Plazzas sur onn

In garant per siu success ei il persunal e pertuccont quel di Reto Schmid: «Jeu sai porscher plazzas sur onn ed aschia dar segirtad allas collaboraturas ed als collaboraturs.» Tuttina eis el era pertscharts dalla luna dalla natira, dalla tecnica e dalla politica: «Cuort suenter il temps da corona savevan nus furnir products ella Corea dil Sid. Lu ei il Canal dil Suez staus serraus pervia d’in incap cun in bastiment. Il prezi per menar nossa rauba cun in container per meins da Sedrun ella Corea sil Sid ei carschius d’in mument sin l’auter da rodund 2500 dollars sin tochen 17 500 dollars. Aschia ei quell’incarica ida a fin lu.»