Per plascheir en cup «Viva agl avioul»
Taimp da stad, taimp da consumar glatsch. Chegl cunzont er ainten restorants, ustareias e sen las terrassas. I dovra ensatge fantascheia e gio sa venda igl glatsch anc migler. Chegl mossa en exaimpel rumantsch a Savognin.
Glatsch vign bagn consumo sur onn. Naturalmaintg s’augmainta igl consum da glatsch gist er cura tgi vagn temperaturas scu las davosas emdas. En bung affar è glatsch er pigls restorants, per las ustareias e per chels travagls tg’on ena terrassa.
Actualmaintg consumo bler glatsch vign er aint igl restorant Tgesa Romana a Savognin tar Mirco Gruber e Daliah Steiner-Gruber. I dat ena raschung persiva. Dasper la carta da dultschems survign igl giast er ena carta speziala cun cups da glatsch. Singular è tgi igls noms digls cups on tots en nom rumantsch. Daliah Steiner-Gruber, la manadra digl restorant dei, tgi graztga a chella carta speziala vigna consumo per en po daple glatsch. Ella retscheva er adegna puspe cumplimaints per aveir do agls cups en nom rumantsch.
«Amour per omgias» u er «Allegra alla tschigulatta»
Dus exaimpels da noms da cups tgi dat aint igl Tgesa Romana: «Amour per omgias» u «Allegra alla tschigulatta». Igl cup «Amour per omgias» è en glatsch da vaniglia cun omgias tgodas e cun groma. Igl cup «Allegra alla tschigulatta» è navot oter tgi en cup Danemarc, egn classicher. Pigl cup Romana cun fraias vign renunztgia agl nom popular cup Romanoff e deditgia igl doltsch agl nom dalla tgesa. Per far chel cup scu tots igls oters ò Mirco Gruber pero piglia glatsch da Filisour dalla famiglia Heinrich. Igl cup «Viva agl avioul» vign fatg cun glatsch da mêl, apricosas e scu decoraziun en schinumno «Honigmandel-Granola».
Tgi igl Tgesa Romana ò success cugls cups «rumantschs» è en fatg fitg positiv ed animescha eventual er oters ustiers ed ustieras datscherner noms rumantschs, betg angal tigls cups da glatsch, mabagn er tar otras speisas.
60 milliuns liters glatsch
Tenor l’Associaziun naziunala digls producents da glatsch vign an Svizra maglea e consumo fitg bler glatsch. An en onn vign consumo 60 milliuns liters glatsch. Per testa èn chegl 6 liters glatsch. Dalla somma da 60 milliuns liters glatsch vignan stgers dus terzs consumos dalla producziun indigena.
Remarcabel è er tg’ena buna part digl glatsch vign consumada a tgesa. Radond 29 milliuns liters glatsch vignan cumpros an furma da multipac u bidons e chegl ainten negozis e buteias. Alla testa dalla rangaziun digl glatsch è an Svizra glatsch da vaniglia, da fraias e da tschigulatta. Tigl bastunet da glatsch (Stängeli) è la «Rakete» igl glatsch preferia da vigl e gioven. Per onn vignan an Svizra vandias 9 milliuns tocs «rachetas». Cun er sa midar an Svizra la stad las temperaturas vign or da chella raschung adegna consumo daple glatsch. (fmr/gns)
Gust da leger dapli?