120 suttascripziuns pil center dil vitg
Dapi in’jamna rimna ina gruppa d’indigens da Surcuolm suttascripziuns per salvar il center dil vitg da Surcuolm sco spazi da viver e habitar. Entochen ier mardis han ils iniziants e las iniziantas gia rimnau la mesadad dallas 120 suttascripziuns. L’iniziativa duei vegnir inoltrada ton pli spert alla suprastonza communala. Lezza ha peda in onn da prender posiziun tier l’iniziativa.
Ina dallas finamiras dallas iniziantas e dils iniziants da Surcuolm ei da spurlar ord igl ogn las participontas ed ils participonts dalla radunonza communala da Sursaissa-Mundaun. Lezza ha liug ils 28 d’uost 2026. Leu ha il suveran da decider davart ina midada dalla planisaziun locala ella fracziun da Surcuolm. La planisaziun da Surcuolm duei numnadamein vegnir revedida en quei senn ch’igl investur Mario Casanova da Cuera sa realisar amiez il vitg siu project da treis edifecis cun 60 habitaziuns.
Referendum ei caussa clara
Sche che la radunonza communala accepta la revisiun dalla planisaziun locala da Surcuolm, vegn la gruppa – ch’ei ussa era vidlunder cun l’iniziativa per salvar il center da Surcuolm – a lantschar il referendum. Tenor la constituziun communala da Sursaissa Mundaun stuessen ils opponents e las opponentas lu rimnar 80 suttascripziuns enteifer 30 dis. Per Irene Schneider che meina la gruppa d’iniziativa eis ei clar ch’il referendum vegn lantschaus, sche la revisiun dalla planisaziun vegn acceptada ils 28 d’uost. «Nus vegnin mai e pli mai ad acceptar ina tala decisiun e fagein segiramein diever dil referendum», di Irene Schneider. El medem mument cul referendum ei l’iniziativa «per in svilup supportabel amiez il vitg da Surcuolm» lu gia deponida tier la suprastonza communala.
Ignorau structuras existentas
Ton Irene Schneider sco era Simone Halter dalla gruppa d’iniziativa mettan il punct sigl i cun pretender che la suprastonza communala havessi saviu untgir a confruntaziuns cun iniziativas politicas. La suprastonza havessi tenor ellas saviu sebasar silla lescha da baghegiar veglia da Surcuolm. Quella seigi aunc adina en vigur malgrad la fusiun. «Tenor lezza lescha fuss ei numnadamein gnanc stau pusseivel da realisar ils baghetgs projectai digl investur da Cuera», di Simone Halter. Ed Irene Schneider aschunta: «Enstagl propona la suprastonza communala ussa da midar la planisaziun locala da Surcuolm. Nus havein priu notizia da quei, mo nus acceptein buca quei e mein sillas barricadas cun tuttas pusseivladads che nus havein.»
«Casas che semeglian scatlas da calzers»
La gruppa d’iniziativa da Surcuolm cun Irene Schneider e Simone Halter alla testa di che quei project digl investur Mario Casanova fetschi empaglia la structura dil vitg e la moda e maniera usitada da baghegiar a Surcuolm.
Per realisar la nova surbaghegiada stuess ins spazzar la casa da scola, l’anteriura casa communala, la halla plurivalenta e la plazza da sport amiez Surcuolm. Per Simone Halter ed Irene Schneider in maletg nunpusseivel. «Nossa suprastonza communala ei la cuolpa che nus da Surcuolm stuein sefatschentar ussa cun casas sco scatlas da calzers, baghetgs che prendan insumma negin risguard sil maletg dil vitg. Quella surbaghegiada fa empaglia noss’entira identitad», dian las menadras dall’opposiziun.
Co rimnar 120 suttascripziuns?
Per che l’iniziativa che pretenda in svilup supportabel dil center da Surcuolm reusseschi, drova ei 120 suttascripziuns. Mo las suttascripziuns da Surcuolm tonschan buca per vegnir sin 120 suttascripziuns. Las duas iniziantas Irene Schneider e Simone Halter dian ch’ellas hagien rimnau enteifer in’jamna circa 60 suttascripziuns. Ils proxims dis vegn la gruppa a cuntinuar ed era ad esser presenta igl 1. d’uost cun in stan alla fiera dil vitg. «Nus essan perschuadidas che nus vegnin da rimnar las 120 suttascripziuns ed ils 28 d’uost sperein nus da saver explicar al suveran nos arguments.»
Iniziativa e referendum
En connex cun las stentas dalla gruppa d’opposiziun da salvar la plazza amiez il vitg dat ei dus instruments politics relevants il medem mument. L’iniziativa communala ed il referendum ad ina decisiun dil suveran cumparan era egl artechel survart.
Iniziativa
La gruppa d’opponentas ed opponents da Surcuolm ha lantschau ina iniziativa che pretenda ch’ei vegni stipulau ella nova lescha da baghegiar communala ch’ei detti in svilup per saver viver e habitar el center dil vitg da Surcuolm. Quella iniziativa che basegna 120 suttascripziuns vegn deponida tier la suprastonza communala che ha in onn peda da prender posiziun e da tractar ella.
Referendum
Il referendum che l’opposiziun ha annunziau da vuler prender ha buca da far directamein cun l’iniziativa, mobein culla tractanda dalla radunonza communala da Sursaissa Mundaun dils 28 d’uost 2026. Leu propona la suprastonza communala da midar la planisaziun locala da Surcuolm per ch’igl investur Mario Casanova da Cuera sappi realisar sia surbaghegiada. En quei connex ha la medema gruppa che ha lantschau l’iniziativa annunziau da prender il referendum che basegna 80 suttascripziuns enteifer 30 dis. (fmr/mg)
Cuorta posiziun dalla suprastonza communala
La suprastonza communala da Sursaissa Mundaun ha buca rispundiu directamein allas damondas dalla FMR. Ferton ch’il president communal Ernst Sax ei en vacanzas ha siu vicepresident Michael Cahenzli denton priu cuortamein posiziun tier la damonda tgei che schabegi cun l’iniziativa. La suprastonza communala vegni a sefatschentar cun l’iniziativa, schispert che quella seigi inoltrada formalmein alla vischnaunca. «Pil mument ha la suprastonza communala neginas enconuschientschas davart il cuntegn exact dall’iniziativa. Suenter l’entrada dall’iniziativa vegn denton igl proxim proceder examinaus tenor las prescripziuns dalla constituziun communala. La procedura vegn exequida conform agl uorden.» (fmr/mg)
Gust da leger dapli?