Sport denter tschiel e tiara

Il sport da ballontschar silla tschenta cun ina ladezia da 2,5 entochen tschun centimeters vegn numnaus «slackline». La disciplina da concuorer ellas altezias senumna «highline». A Laax Murschetg han ils finals dil campiunadi mundial da highline giu liug la davosa fin d’jamna. Nina Mappes, la responsabla per las medias leu al campiunadi mundial, ha discurriu d’ina gronda sfida per las atletas ed ils atlets da concuorer denter ils edifecis dil rockressort.  Ei drovi aunc dapli preparaziun, ruasseivladad e cunzun curascha da ballantschar lunsch sur il terren sin ina distanza da 70 meters d’in punct a l’auter. Il sport da highline seigi daventaus fetg pretensius enteifer ils circa 20 onns ch’ei detti quei sport.

10avel da 17 finalists

Il pli spert Svizzer ella disciplina da speed (tempo) silla highline ei Ramun Tomaschett (28), oriunds da Cumbel ed oz domiciliaus en Purtenza. Els finals dil campiunadi mundial a Laax dalla davosa fin d’jamna ha el contonschiu il 10avel rang da 17 absolvents ella disciplina speed. Ed ella disciplina freestyle ei Tomaschett vegnius 14avel da 17 finalists. Suenter ils finals ha Ramun Tomaschett commentau ses resultats:  «Cheu essan nus al campiunadi mundial. Il nivel cheu ei brutal aults. Encunter ils megliers dil mund eis ei nundetg grev.» Il victur brasilian Matheus Vidal hagi absolviu ils 70 meters speed en 26,07 secundas. Ed el hagi duvrau pil medem tschancun 44,46 secundas, quei seigi ina gronda differenza, ha Ramun Tomaschett detg. «Mo jeu hai sentiu ch’jeu hai fatg in bien progress dapi il davos campiunadi mundial 2024. Ed jeu sun enorm motivaus da far vinavon.» Ramun Tomaschett ha era uonn gudignau il campiunadi svizzer ella disciplina speed ed ei daventaus secund ella concurrenza da stil liber.

Stentusa emprema cuorsa

«Jeu seregordel aunc bein dall’emprema gada ch’jeu hai priu part d’ina concurrenza silla highline», ha Ramun Tomaschett detg enviers la FMR. «Jeu havevel gronda tema. Igl ei stau mega stentus.» L’altezia, la tschenta satella, tut che balluchi: quei seigien temas fundamentalas ch’in carstgaun hagi semplamein, ha igl atlet che lavura ella professiun da scrinari detg. «Jeu hai duvrau bunamein dus onns ed hai stuiu trenar enorm intensiv entochen che quels sentiments da tema ein tschessai.»

In sport cun potenzial

Tenor Ramun Tomaschett  fa la Federaziun svizra da slackline  gronds sforzs per recrutar atletas ed atlets giuvens e per fundar uniuns da slackline. «Quei ch’ins sto saver ei ch’il sport da highline ei aunc giuvens en Svizra. Ins sa cumparegliar quel cul reiver. Avon 30 onns discurreva aunc negin dil sport da reiver. D’etablir in sport drova bia engaschament e perseveronza. Mo jeu hai l’impressiun ch’ei vegni.» Ramun Tomaschett ha era detg ch’el seigi da buna speronza, sch’el vesi cons affons che ballontschien sin tschentas silla plazza a Laax Murschetg.

Muments da wow

Per l’emprema gada ein las tschentas per las cuorsas da highline vegnidas stendidas a Laax denter la staziun da val a Murschetg ed ils edifecis dil rockressort. Sco quei che Nina Mappes, la responsabla da medias scriva, hagien ils organisaturs duvrau cranas specialas per construir igl areal da cuorsa. «Gia duront che nus preparavan las cuorsas ha ei dau aschinumnai muments da ‹wow› da persunas che sedumandavien, co ei seigi pusseivel da ballantschar sin quei tschancun senza incaps.»

Ils onns 2022 e 2024 ha il campiunadi mundial da highline giu liug si Crap Sogn Gion. Il motiv ch’ins ei vegnius giu a Murschetg cugl event ei, tenor la responsabla da medias, la pli gronda independenza dall’aura. Il secund motiv ei ch’ins vul possibilitar ad in publicum pli vast d’assister allas concurrenzas da highline. La fin d’jamna vargada ha in grond publicum da simpatisontas e simpatisonts susteniu las atletas ed ils atlets, e quei cun relaziuns dall’aura idealas.