Danovamaintg en veir success

Siva digl 2007 vign igl pass da vacanzas an Surses organiso an collaboraziun cun la Pro Junior an lavour voluntaria. Alla gruppa d’organisaziun principala appartignan Aurelia Balestra Maverick da Savognin, Jantine Schmid da Riom e Tamara Sonder da Salouf. Pled e fatg alla FMR ò do Aurelia Balestra Maverick. Ella ò detg igl suandont: «Sainza igl ferm sustign finanzial digl cumegn da Surses, dalla Banca cantunala, dalla Banca Raiffeisen, dall’ÖKK, dalla Pipi Börse e d’oters sponsours fiss betg pussebel da manar tras igl pass da vacanzas». La donna tg’è er mamma e tgi s’angascha ferm per la realisaziun da chella purscheida ò managea: «Nous ischans ple tgi angraztgevels a tots chels gremis ed a tot las organisaziuns tgi sustignan igl pass da vacanzas an Surses».

Sa musso generous anvers chella purscheida vegia er l’organisaziun Turissem Val Surses Savognin Beiva SA cun regalar igls bigliets d’antrada pigl kino sot tschiel avert agl Lai Barnagn. Chella seira è stada egna da 45 purscheidas digl pass da vacanzas 2026 an Surses.

Aint igl rom digls davos onns

Chegl tgi pertotga igl domber digls participants e dallas participantas digl pass da vacanzas da dus emdas, tg’è ia a fegn venderde passo, dei Aurelia Balestra Maverick: «Cun 74 unfants schea chel domber aint igl rom digls davos onns». Ins vegia bagn er gio gia anfignen 80 unfants tgi vegian piglia part agl pass da vacanzas, ma igl domber da participaziun vegia er da far cun annadas pi fermas u cun annadas pi deblas.

Sa participar dastgan allas purscheidas unfants tgi scumainzan l’amprema classa primara anfignen tar unfants tg’on termino la 6avla classa primara. Cun esser igl pass da vacanzas sustignia da plessas varts, paian genitours per unfant 30 francs, chegl independent digl domber digls curs tg’en unfant viseta. Ultra da chegl costa igl schinumno abunent general grischun pigl traffic public ansomma betg bler.

Tranter 5 e 6 curs

Cun excepziun da Beiva e da Marmorera on unfants da tot las otras nov vischnancas da Surses fatg diever dallas 45 purscheidas digl pass da vacanzas. Aurelia Balestra Maverick ò detg: «Igl è bel tgi en unfant fò an media tranter 5 e 6 curs». Oters unfants seian schizont dalla parteida tar otg curs. Singuls curs ins vegia mano tras dobel, cun esser per chels grond interess. En fatg plaschevel seia er tgi pigl pass da vacanzas 2026 ins vegia catto manaders e manadras, ma er las persungas d’accumpognamaint. Er chegl tgi pertotga las localitads per manar tras igls curs sa mossan tots contactos fitg generous. Grond interess vegia sviglia la purscheida da visitar a Tagn tgangs da protecziun, ò menziuno Aurelia Balestra Maverick. La viseta aint igl Museum d’art grischun a Coira u en curs da solt vegian alloura er plaschia a participants e participants. Anvidos seian mattatschs e mattatschas nias digl museum d’art grischun da vurdar l’exposiziun da Susan Hefuna. Siva dalla viseta seian participants e participantas nias instruias chegl tgi pertotga plessas tecnicas da dessignier, chegl tgi vegia plaschia. Lour «ovras» vegian tots dastgea piglier a tgesa.