An dus onns èn Surses e Silvaplana colliias anc pi ferm

Ier, mesemda è stada sensom igl Pass digl Gelgia l’amprema badigleida dalla nova veia per bikers e viandants. Ella magna da Beiva a Silvaplana e duess cunzont rinforzar igl turissem da bike aint igl Grischun. An spezial an Surses è igl project tgi costa 2,3 milliuns sto dispitevel. Igl december 2024 veva igl suveran delibero igl credit d’impegn brut dad 1,4 milliuns francs dalla radunanza communala. Cunter chella decisiun è alloura reuschia igl referendum, uscheia tgi igl project «Juliertrail» ò gia da far ena ronda supplementara. All’urna on alloura votants e votantas da Surses delibero igl matg 2025 cun 51,2 % la somma brutta dad 1,4 milliuns francs per realisar chella senda da mountainbike e da viandar tgi colliescha las dus regiuns vaschignas. Igl suveran digl cumegn da Silvaplana veva gio avant approvo  igl credit brut da radond 900 000 francs e chegl unanim. Digls costs totals da 2,3 milliuns francs surpeglia igl cantun 60 % e vetiers 50 % digls costs da 15 100 francs per la signalisaziun.

35 % dallas veias existentas vignan sanadas

Dalla vart da Surses ò igl tratg dalla veia per bikers e viandants ena lunghezza da ca. 8,7 kilometers. Dalla vart da Silvaplana monta chella lunghezza a 7,7 kilometers. Radond 50 % digl tratg da 16,4 kilometers vign fatg da nov. 35 % dallas veias existentas vignan sanadas e reparadas. Tar 15 % digl tratg è igl stadi optimal, uscheia tg’è betg basigns da far midadas. La largezza digl trasse monta aglmanc en meter, tar ena pendenza maximala da 12 %. All’amprema badigleida èn stos preschaints Daniel Bosshard, igl president communal da Silvaplana e Daniel Wasescha, igl mastral digl cumegn da Surses. Per las lavours da construcziun è responsabla l’interpresa «Allegra» da Puntraschigna, ena firma spezialisada per planisaziun e construcziun da veias da mountainbike e da viandar. Lukas Häusler dalla firma ò detg anvers la FMR: «Chesta stad vign realisada da tottas dus varts digl pass l’amprema etappa e la stad 2027 alloura la sagonda etappa». Da preschaint seian vedlonder cun la construcziun dalla veia otg omens. Igl 2028 da premaveira duess esser l’avertura dalla veia per bikers e per viandants.

En de fitg plaschevel

I seia en de fitg plaschevel, ò punctuo Daniel Wasescha, igl mastral digl cumegn da Surses. El ò bagn detg tgi l’amprema badigleida seia bagn betg ensatge fitg spectacular, persiva seia igl project fitg singular ed er aparti. Chegl er cun esser igl «Juliertrail» en project communabel tranter dus cumegns vaschigns. Tgunsch pussebel tgi antras chel project communabel davainta la collaboraziun tranter Surses e Silvaplana anc pi ferma. Igl mastral digl cumegn da Surses ò cunzont accentuo tgi davent dall’ideia digl project anfignen tar la realisaziun da chel, seia igl cumegn da Silvaplana consequentamaintg sto en partenari serious pigl cumegn da Surses. Daniel Wasescha ò alloura er ludo la collaboraziun digl cumegn da Surses cun ples proprietaris da taragn, cugls quals ins vegia alla fegn finala catto ena cunvigna per ansomma realisar igl project.

Er Daniel Bosshard, igl mastral digl cumegn da Silvaplana, ò angal catto bungs pleds per la collaboraziun cun Daniel Wasescha e cugl cumegn da Surses. Silvaplana seia en li tgi vegia investia grondas sommas pigl sport nautic, ma l’investiziun pigl «Juliertrail» ed uscheia er pigl bike seia ena fitg buna tgossa. Jan Steiner, igl directour turistic da Turissem Nagiadegna, ò detg tgi la planisaziun digl project vegia tuttegna cuzzo set onns ed ossa davainta igl project realitad cun l’amprema badigleida. Albert Kruker, igl directour turistic da Val Surses Savognin Beiva, el spera tgi graztga a chel project communabel s’avischignan las dus regiuns turisticas anc  daple.