Culla Pendiculara da latg sil Crap da Flem

Varga 50 onns ei la pendiculara da Fidaz sil Crap da Flem stada a disposiziun sulettamein al persunal dall’alp ed al transport denter auter da latg. Ussa semida quei. La pendiculara nova stat a disposiziun era a viandontas e viandonts igl avegnir. Sco Flem Laax Falera Management SA scriva en ina communicaziun als mieds da massa, pon las duas cabinas per mintgamai otg persunas transportar en tut 70 persunas per ura sil cuolm, respectiv engiu. Il viadi cuoza mintgamai rodund siat minutas. Il menaschi ei cumpleinamein automatics. La pendiculara vegn survigilada dil pilotadi da Foppa dalla Gruppa Arena Alva anora. Il menaschi turistic cuoza mintgamai dil matg entochen igl october. Possessura dalla pendiculara ei la vischnaunca da Flem. L’avertura ufficiala dalla Pendiculara da latg ei sonda, ils 22 d’uost 2026 el rom dalla fiasta da Fidaz. La fiasta d’avertura ei allas 13.00.

Novas pusseivladads

Dapi questa stad porscha Flem Laax gest pliras novas pusseivladads da scuvierer il mund muntagnard. Cun metter en funcziun cumpleinamein il FlemX entochen la staziun da muntogna a Cassons sin 2500 meters sur mar e la nova Pendiculara da latg da Fidaz sin l’Alp Crap da Flem sin 2054 meters sur mar seporscha igl avegnir ina cumbinaziun attractiva pils viandonts. Tgi che carrescha cun il FlemX tochen Cassons e traversa il territori dil Crap da Flem, gauda ina ruta cun in panorama impressiunont. Da leu sa el per exempel serender a val culla Pendiculara da latg. «Era pils adherents dil sport da reiver porscha la pendiculara novas pusseivladads. Tgi che ha ascendiu la spectaculara ruta historica Pinut sa schanegiar las musclas cul viadi aval culla pendiculara. E tgi che vul guder in’autra aventura pren la senda d’alp Scala Mola naven dil Crap da Flem che meina en rodund in’ura giu silla planira aulta da Bargis», scriva l’interpresa.