Project casa da scola vegn all’urna
Cun gronda maioritad han vischinas e vischins da Tujetsch detg gie la mesjamna sera ad in credit da 9,156 milliuns francs per sanar ils baghetgs dalla scola a Sedrun. Suenter quei conclus dalla radunonza communala ha la votaziun all’urna il davos plaid.
La mesjamna sera ei la radunonza communala da Tujetsch sefatschentada dalla damonda dalla suprastonza communala per in credit d’investiziun da 9,156 milliuns francs per sanar ils baghetgs dalla casa da scola a Sedrun. Cun gronda maioritad ha ella acceptau quel, aschia che la damonda pil credit sa vegnir suttamessa alla votaziun all’urna igl 1. da november 2026. Ord il ravugl dalla radunonza communala ei vegnida ina proposta ch’ei la fin finala era vegnida acceptada. Pil credit da 9,156 milliuns francs duei ei buc astgar dar ina differenza da cuosts da +/- 15 %. Ils cuosts astgan survargar il credit per maximum 500 000 francs.
Mantener igl existent
Il credit ch’ei vegnius acceptaus la mesjamna sera survescha al manteniment, respectivamein la sanaziun dils baghetgs dalla scola a Sedrun inclusiv la halla da gimnastica. La gronda part dils biebein nov milliuns francs – numnadamein 3,84 milliuns francs – flessegia el baghetg principal dalla scola. Rodund 3,2 milliuns francs ein previ pil baghetg annex encunter nord e 1,34 milliuns francs per la halla da gimnastica. La halla da gimnastica duei vegnir transformada en ina sala da cultura.
Sala per cultura
Sco il president communal Martin Cavegn ha detg sin damonda dalla FMR, han ils cuosts per la sala da cultura futura caschunau empau discussiun alla radunonza communala: «Sche nus lein denton saver nezegiar endretg quella sala igl avegnir, lu stuein nus ademplir ils criteris per la segirtad e lezs cuostan.» Cullas sortidas ch’existan il mument astga la halla vegnir occupada da sulettamein 50 persunas, culla sanaziun e migliur pertuccont sortidas survess ella survir lu a 300 persunas. Per la sanaziun dil plaz da pausa eis ei previu d’investir 350 000 francs e per la garascha per la habitaziun dil pedel 52 000 francs.
Scola baghegiada 1962
La casa da scola a Sedrun ei vegnida erigida 1962. Da 1996 entochen 1999 ein ils baghetgs vegni sanai en pliras etappas. La davos’investiziun ei succedida 2010. Lu ei la tecnica dalla tribuna dalla halla da gimnastica vegnida adattada. Sco la suprastonza communala ha orientau la mesjamna sera il suveran ei l’investiziun supportabla per la vischnaunca. Quei seigi pusseivel grazia als cash flows positivs dils davos onns. Ils davos tschun onns ha la vischnaunca saviu recaltgar en total cash flows (atgna finanziaziun) da rodund 13 milliuns francs.
Gust da leger dapli?