«Atgnamein eis ei mo ina pintga caussa»

Immediat crodan ellas buca si, las cameras privatas ch’ins anfla sporadicamein era a Sagogn. Mo dapi dacuort fan ins forsa dapli stem da quellas cun spassegiar pil vitg entuorn. Pertgei el Fegl Ufficial dils 21 d’uost 2026 ha la vischnaunca fatg attent allas reglas vertentas per «indrezs da videosurvigilonza privats». Quei suenter «differents resuns ord la populaziun» en connex culla protecziun da datas.

Sin damonda dalla FMR ha la presidenta communala da Sagogn Katrin Blumberg denton sincerau: «Atgnamein eis ei mo ina pintga caussa.» En tut hagi ei dau treis annunzias tier la vischnaunca davart cameras da survigilonza privatas e quei enteifer in onn e miez. «La davosa vein nus survegniu dacuort e silsuenter decidiu d’informar publicamein sur dallas reglas», aschia Katrin Blumberg. Dil reminent seigi ei stau treis cass independents in da l’auter.

Negins ulteriurs pass

Sco la presidenta communala ha detg vinavon, seigi la caussa actualmein liquidada per la vischnaunca: «Sch’ei dat zacu puspei in basegns d’agir, vegn a semussar.»

Tonaton eis ei buca caussa dalla vischnaunca da controllar il diever da cameras privatas. Sco igl Incumbensau federal per la protecziun da datas e per la transparenza (IFPDT) scriva sin sia pagina d’internet, stoppien persunas pertuccadas da violaziun dalla persunalitad sedustar sezzas. E pil pli seigi ei era buca caussa dalla polizia: «Per regla ei la polizia buca responsabla per videosurvigilonzas privatas, mobein mo sche quellas succedan cun tun ni pertuccan la sfera secreta ni parts intimas.» Autruisa ston persunas pertuccadas sedrizzar al possessur ni alla possessura dalla camera. Da quel san ins pretender da stizzar eventualas registraziuns da video ni, sch’ins secunvegn buc en caussa, far in plogn civil.

Sco igl IFPDT scriva denton era sin sia pagina d’internet, fetschi ei tuttina senn da contactar la vischnaunca: «Ei dat vischnauncas cun posts per la protecziun da datas che cusseglian ed intermedieschan en cass da damondas ni dispetas en connex culla videosurvigilonza entras privats.» In tal post ha la vischnaunca da Sagogn denton buc.

«Savens maunca l’informaziun transparenta»

Per che persunas pertuccadas sappien sedustar, ston ellas denton saver dalla videosurvigilonza. Mo sco igl IFPDT scriva, seigi gest quei in dils problems: «Savens maunca l’informaziun transparenta.» Sco ina dallas reglas vala denton che la videosurvigilonza vegni fatga veseivla. «Persunas pertuccadas ston vegnir informadas ch’ellas vegnan registradas, avon ch’ellas entran la zona da survigilonza», aschia igl IFPDT.

Tgi che survigilescha siu schischom cun ina camera, sto plinavon risguardar ulteriurs principis:

• La survigilonza sto da principi serestrenscher sigl agen schischom.
• La survigilonza sto survir ad in intent giustificau ed esser commensurada.
• Registraziuns astgan vegnir arcunadas mo aschi ditg sco quei ch’igl ei necessari pigl intent dalla survigilonza (per regla 24 uras).
• Il cerchel da persunas che san acceder a maletgs en directa ni registraziuns arcunadas ei da tener aschi pigns sco pusseivel.
• Ins sto differenziar, sch’ei drova ina survigilonza en directa ni sch’ei tonscha da registrar il schischom per evaluar ils maletgs en cass da basegns. Lu astgan ins far diever dalla registraziun, mo sche necessari.
• La publicaziun da registraziuns ei mo lubida suenter consentiment dallas persunas registradas.
• Pertucca la survigilonza emploiadas ed emploiai, eis ei era da risguardar il dretg da lavur. Igl ei buca lubiu da survigilar permanentamein il persunal.

Sche quels principis vegnan risguardai a Sagogn, ei buca stau d’eruir.