«Ina purschida che maunca en Surselva»

«Nus furnin tut.» – Quei han ins dacuort saviu leger sin in flyer dil niev currier cun velo da Glion e contuorn. E quei ha era il tgau davos la nova purschida, Martin Leuzinger (53), confirmau en in discuors culla FMR: «Da principi savein nus propi furnir tut. Sigl annex per velos sai jeu schizun transportar mobiglias.»

Aunc seigien talas furniziuns denton buca succedidas en Surselva, aschia il Glarunes che lavura pér dapi il mars da quest onn sco currier da velo a Cuera e ch’ei ussa responsabels per la purschida a Glion: «La finamira ei da sviluppar plaun plaunet il currier en Surselva e da collaborar stretgamein cun Cuera, nua ch’ei dat igl aschinumnau ‹Velochurier› dapi 15 onns.» Gronda reclama hagi ins perquei buca fatg tochen uss. Ins vegli ferton far las empremas experientschas.

Per fatschentas e privats

Da model per la purschida a Glion e contuorn survescha denton quell’existenta a Cuera, nua ch’il currier cun velo fa denter auter furniziuns pil spital, per bibliotecas e per glieud pli attempada, aschia Martin Leuzinger: «Quei ei ina purschida che maunca en Surselva. Igl ei savens era furniziuns per glieud che sa buca pli sezza ir per lur rauba.» El seigi perquei era en contact cun fatschentas sco l’apoteca che vegn a secasar el niev baghetg dalla staziun da Glion per instradar ina collaboraziun.

Il currier cun velo seigi denton buca mo ina purschida per furniziuns da fatschentas. Era sco persuna privata sappien ins far diever dil survetsch. «En quei cass ston ins gnanc bandunar la casa. Sco currier cun velo vegn jeu per la brev e furneschel ella suenter la consignaziun enteifer ina ni maximalmein duas uras», ha Martin Leuzinger detg. El medem mument ha el denton era constatau ch’ei seigi gnanc pusseivel da realisar ina tala purschida dad in di sin l’auter: «Ei drova pazienzia tochen che tut ei instradau.» Per simplificar il contact culla clientella hagi el era gia incumbensau da realisar ina app.

«Pli ecologics e pli efficients»

Mo pertgei insumma realisar in currier cun velo, sch’ins sa era spedir brevs e pacs per posta? – «Il currier cun velo ei buca mo pli ecologics e spargna per exempel il viadi che brevs fan els centers da sortir ella Bassa. Nus essan era pli efficients», ha Martin Leuzinger sincerau. Il Spital cantunal da Cuera fetschi per exempel gest pervia da quei diever da lur survetsch per spedir saung da donaziun ad auters spitals. «Ina spediziun ad in spital a Turitg drova aschia mo paucas uras. Nus purtein quella sin staziun, leu succeda la midada sil tren ed a Turitg transportescha il proxim currier cun velo il pac alla destinaziun.»

In ulteriur avantatg seigi plinavon igl aspect social. «Savens fan persunas che san buca pli bandunar lur dacasa diever da nossa purschida. Aschia sedat mintga ga era ina contact social per els e per nus. E per quei pren jeu era bugen temps», ha il currier da Glion explicau.

Ei drova plascher

Insumma seigi ei buca pusseivel da far questa lavur – ina lavur ual aunc nunusitada en Surselva – senza plascher. «Nus essan da tutt’aura da viadi ed era igl unviern. Tgi che vul far il currier cun velo, sto en mintga cass esser idealist e passiunau», aschia il velocipedist da professiun. El sez hagi denton mo casualmein cattau questa lavur en in inserat. Sco sportist passiunau hagi quei denton caztgau immediat. «Jeu fetsch mintga meins entuorn 2000 kilometers cun velo e quei per gronda part senza igl agid d’in motor electric. Mo jeu drovel era quei», ha Martin Leuzinger detg ed aschuntau: «Clar ch’jeu vai magari barbagat la sera. Igl ei ina biala dolur.»

Dil reminent ei Martin Leuzinger actualmein il sulet currier cun velo en Surselva che gauda il barbagat dalla sera. Mo era quei pudess semidar tut tenor svilup dalla purschida.