«Bler daple tgi angal en bietg da crap»

«Uei, oz vainsa de da festa, lagn cantar cun leghermaint. Gl’è en grond evenimaint, vigl e gioven èn cuntaint.» Chegl èn igls pleds dall’amprema strofa dalla canzung da bavegna digls scolaras e dallas scolaras e digls unfants dalla scoletta. «Per nous tots vogl oss pi lev da far chints e malager. Belas stanzas vainsa er, chegl schizont per zamberger.» Per venderde passo veva igl cumegn da Surses anvido la populaziun dalla val all’inauguraziun uffiziala dalla nova scola (varda boxa). Chella sa catta scu la viglia a Savognin aint igl quartier Grava. Ena fitg gronda raspada è suandada all’invitaziun.

Egna scola per mintgign e mintgigna

Igl cant frestg dalla scoletta ò fatg la punt tigl pled da bavegna da Gianna Sonder, la presidenta digl cunsegl da scola. Ella ò angraztgea a tot las bleras persungas tg’on grond marets tgi Surses ò siva da dus onns da construcziun ena nova scola primara. Mintga singula persunga tgi vegia contribuia igl sies alla realisaziun dalla nova scola seia stada angascheda cun anim e cun tschaffen, ò punctuo Gianna Sonder: «Chel li duess esser en li noua tgi igls unfants pon crescher scu las plantas tgi els on anplanto, crescher scu la veta dallas plantas e purtar fretgs.» Gianna Sonder ò er menziuno tgi chel li duess porscher a mintgign en plaz per sa santeir bagn e sieir. La scola duess er esser en li noua tgi mintgign pò esser sasez e vigna respecto ed er accepto.

Igl vistgia musical ò l’inauguraziun retschet d’ena band da scolaras e d’ena gruppa d’instrumentalists ed instrumentalistas dalla scola. Sa drizzo alla raspada ò er Daniel Wasescha, igl mastral digl cumegn da Surses. El ò cunzont do en sguard anavos ainten l’istorgia digls davos bietgs da scola da Savognin. Bel seia tgi igl suveran digl cumegn da Surses vegia ansomma delibero avant bung treis onns igl credit da radond 25 milliuns francs per realisar la nova scola. El seia cuntaint tgi igls unfants, igls scolasts e las scolastas ed er tgi la populaziun sa legra dalla nova scola.

Stanzas cleras ed ampernevlas

Per l’inauguraziun digl nov bietg da scola ed er pigl gir tras las stanzas da scola è sto fitg grond interess cun esser dalla parteida plessas 100 persungas. Ellas on alloura vasia tgi cun la nova scola ò Surses ena scola moderna e tgi vign er ad adampleir igls basigns d’en bietg adatto da scola. Las stanzas èn grondas, cleras, ampernevlas e vetiers vign tgi l’infrastructura è moderna e cumadevla. I dat er plessas localitads per instrucziuns spezialas e supplementaras. Er la mensa, lò noua tgi mintga de survignan an­fignen 90 unfants giantar, è andrizzada bagn ed avant mang è en grond spazi. Realisada è la scola neida tenor igls plans digls biros d’architectura Ruch e partenari da Son Murezza.

En li da communitad ed avertadad

Igl plevant ser Zenon Tomporowski, igl plevant da Savognin, e ser Adam Pradela, igl plevant da Surses, scu er Helmut Andres, igl celebrant dalla pleiv refurmada da Surses, on surdo la scola nova ainten igls mangs da Dia. Ser Zenon Tomprowski ò detg tg’ena scola seia bler daple «tgi angal en bietg da crap, da lenn u da glas». Ena scola seia en li d’amprender, da crescher e da s’antupar. An scola vignan scuverts dungs, fatgas vignan amiceztgas e mess fundamaints per la veta futura. Ser Adam Pradela ò supplitgia agl Totpussant tgi chel bietg seia en li da communitad, avertadad e pasch.