Pass per pass …

Strusch ein las vacanzas finidas e gia tut che va en siu trot. In termin catscha l’auter. Massa novas entschattas e sco quei che jeu fetschel adina puspei persenn: Aschia vai savens cun biars da nus. Il calender culs termins ei gia emplenius pulit. E sco quei tut serepeta, sun jeu pil pli gest all’entschatta digl onn da scola malsauna. Sco sche quei less dir a mi da patertgar bein e parter en las forzas. E gest duront quella pausa ei la historia, che jeu hai raquintau a mes scolars gl’emprem di da scola, vegnida endamen a mi:

In tat veva schenghegiau a siu beadi ina cazzola da sac. Naturalmein ha il buob vuliu empruar ora quella l’emprema sera. Aschia ein il tat e siu beadi i tard la sera a spass tras igl uaul. Plein plascher envida il buob la cazzola. Mo tgei trumpada: «Tat, quella cheu fa pauc clar. Ella glischa mo grad avon mes peis! Quella sas turnar. Quella ei rutta!» – «Mo pacific, miu buob», di rispunda il tat. «Ti vesas gest quei che ti drovas per vegnir vinavon e turnar a casa! Pren tia cazzola e va pass per pass tras la veta.»

Ir pass per pass tras la veta. Prender il mintgadi dafertontier e far la lavur ina suenter l’autra. Ins di magari: La lavur scappa buc. Ed era sch’ei gartegia buca tut sco giavischau, va il mund buca grad sutsu. Jeu stoi mo haver la fidonza che tut vegni bien. Pertgei jeu sun gie buca persula da viadi. Biars carstgauns accumpognan mei. Jeu sai gie dumandar per agid. Ed ina caussa che ei en mia veta fetg impurtonta. Quei che dat a mi la pli gronda quietezia ei che Dieus lai mei buc amiez liug. Cun agid da surengiu, sco quei ch’ins di magari empau salop, sai jeu rugar: Dai a mi la quietezia da prender las caussas sco ellas ein. Midar quei che jeu sai midar e schar dalla vart las autras. E dai a mi la sauna raschun da distinguer ina caussa da l’autra. Cun quella fidonza e speronza sai jeu ir pass per pass tras miu mintgadi. Gie, perfin ver la curascha da volver inaga ni l’autra la pagina avon che fixar il proxim termin.