Aua, sulai e movimaint

Daspö ils prüms mai 2021 es Claudio à Porta da Scuol directer da la ditta Energia Engiadina (EE). Quista ditta es cuntschainta a minchün in Engiadina Bassa, almain duos jadas l’on rivan ils quints da l’EE pel consüm d’energia in mincha chasada. L’EE furnischa energia solara ed idraulica e pissera insembel cun mia Engiadina per la digitalisaziun cun fibras da vaider in tuot la regiun. Adonta dal grond svilup digital dal ultims ons, ha gnü il directer alch chi til staiva sül stomi da prüm’innan. Nempe la pre-schentscha e l’aspet visual da sia firma. «Nus nu vaivan ingüna strategia, i mancaiva ün concept d’identità e da visualisaziun», declera Claudio à Porta ed agiundscha cha cul logo existent as rivaiva al cunfin impustüt online ed in dumondas digitalas.

Concept professiunal d’identità

Quai s’ha uossa müdà als 1. settember 2026. La preschentscha online es gnüda adattada, ils büros a Bagnera portan ün nouv büschmaint. «Ils prossems desch dis vain müdà eir amo il logo sün tuot ils veiculs», quinta il directer plain superbgia. Ch’els nun hajan uossa be ün nouv logo, dimpersè üna nouv’identità cun ün concept professiunal da comunicaziun. Ch’insembel cun üna ditta specialisada s’haja defini in ün lavuratori las valurs da la ditta ed uschè creà üna visualisaziun adattada chi cumbina elemaints tradiziunals cun ün svilup d’energia modern e persistent. Cha la basa dal nouv logo saja ün sgrafit tradiziunal chi decorescha daspö il 17avel tschientiner bleras fatschadas da chasas engiadinaisas. Ils perits han sviluppà il nouv logo cun singuls elemaints chi simboliseschan sün basa dal sgrafit il cuors da l’aua, energia solara o palas da turbinas. Ils archs caracteristics dal sgrafit preschaintan las ragischs in Engiadina Bassa ed unischan ils singuls elemaints. Restada listess es, tenor Claudio à Porta, unicamaing la culur gelg e blaua: la culur gelgua simbolisescha il sulai, la culur blaua l’aua. «Schi’s maisda quistas duos culurs as survain la culur verda chi simbolisescha persistenza», quinta Claudio à Porta.

«Nossa energia» sco posiziunamaint

Sco cha’l directer da l’EE declera, nun es gnü creà be ün nouv logo, dimpersè üna nouva strategia cun posiziunamaint da comunicaziun cler: «Nossa energia» es nouv messagi da l’Energia Engiadina. Las valurs sun la lavur artischana, l’energia da la regiun e pretensiuns digitalas per l’avegnir. «Tuot quai vaina uni in üna strategia ed ün nouv logo», disch Claudio à Porta. Cha’ls prossems quints d’energia chi vegnan tramiss in tuot las chasadas in Engiadina Bassa portaran lura il nouv logo cun üna scrittüra adattada. Il directer da l’EE es persvas cha la nouva strategia visuala haja ün grond effet da recugnuschentscha e cha tuot l’Engiadina Bassa s’adüsarà bain svelt vi da la nouva preschentscha dal furnitur d’energia indigen.