Emprem festival ha liug il mars a Trun

(anr/sr) «La chanzun rumantscha» ei in’uniun ch’exista dapi dus onns e dumbra rodund 120 commembras e commembers. Las finamiras principalas dall’uniun ein da tgirar ils cumponists e las canzuns romontschas e schar viver quellas. In mied efficient ei segiramein il festival da «La chanzun rumantscha» al qual l’uniun envida dils 15–17 da mars 2019 a Trun. Tenor Clau Scherrer ei l’organisaziun a liunga vesta sesplegada fetg bein ed ei seigien actualmein fatschentai cull’organisaziun a cuorta vesta, pia cun programs, emprovas e tut quei ch’ei drovi per la realisaziun dil festival da treis dis. «Igl ei in project fetg bi ed interessant», selegra Scherrer. El center dil festival stat la canzun romontscha. Quei seigi empau different allas fiastas da cant nua ch’ils interprets, pia ils chors e lur prestaziuns, seigien el center. Secapescha che la canzun seigi era leu fetg impurtonta, ei mondi denton plitost per l’interpretaziun da tala.

Program variont ed interessant

Il program dil festival ch’entscheiva il venderdis sera ei fetg varionts: Ei dat per exempel in’avertura dil festival cun cantauturs romontschs. Suenter l’avertura vegnan quels a concertar ella caplutta s. Onna, ella sala d’art ed el suttetg dil center communal. Mintga cantautur enconuschent ha astgau eleger in giuven cantautur ed aschia concerteschan Astrid Alexandre ensemen cun Sidonia Caviezel, Thomas Cathomas cun Fiona Cavegn e Pascal Gamboni cun Dario Hess. Il program dalla sonda entscheiva cun «cant en famiglia – concert e cant aviert»: Ensemen cul Chor d’affons dalla vischnaunca da Sumvitg (direcziun: Flavia Walder) ed il Chor d’affons Surselva (direcziun: Rilana Cadruvi Scherrer) san pign e grond, giuven e vegl cantar canzuns d’affons. Pli tard presentan Corin Curschellas ed ils Fränzlis da Tschlin il niev disc «1, 2, 3 dai & hop». Il suentermiezdi ha il final dalla concurrenza da novas cumposiziuns liug e la sera dat ei in concert da gala. Corsin Tuor culla Brass Band Berner Oberland, «Incantanti» e «Cantus Firmus Surselva» presentan «Pèrlas rumantschas III». Suenter il concert dat ei la pusseivladad da star da cumpignia cun Ursin Defuns e Gion Andrea Casanova per cantar canzuns popularas da tut las regiuns romontschas.

Festival cun colorit sursilvan

Dumengia ha ei num Matinée «La canzun d’art romontscha». Cumponists da professiun han scret numerusas e grondiusas cumposiziuns per cant solistic, per part ein quellas aunc nunenconuschentas. Biars cantadurs da professiun tschercan numnadamein adina puspei nova litteratura. Quels dus munds vul l’uniun menar ensemen sin quella via – cumponists ed interprets – en in concert. Sin tribuna vegnan ad esser: Lothar Burtscher (bariton), Sara-Bigna Janett (sopran), Judit Scherrer (sopran) ed Alena Sojer (piano). D’udir ein premaudiziuns e canzuns che vegnan presentadas darar d’Armon Cantieni, Gion Antoni Derungs e Beni Dolf. La finfinala dat ei ina discussiun da podi cun Iso Albin, Astrid Alexandre, Peter Appenzeller, Laura Decurtins e Beni Vigne che filosofeschan davart «l’olma rumantscha» e la situaziun generala dil cant e dalla musica en tiara romontscha. La discussiun vegn menada da Martin Gabriel. Il program detagliau e la pusseivladad da reservar plazs e cumprar bigliets per las occurrenzas ch’ein buca libras ein d’anflar silla pagina d’internet www.chanzunrumantscha.ch. Il festival dalla canzun romontscha duei haver liug mintga treis onns ed adina en in’autra regiun. Perquei tscherca l’uniun gia uss in liug pil secund festival da «La chanzun rumantscha». Tenor Scherrer han empremas sentupadas cun uniuns da Surmir gia giu liug. L’idea seigi da realisar leu il secund festival, ussa stoppien ei denton aunc spitgar la risposta dils da Surmir. Sco Scherrer ha declarau duei il festival mintgamai haver il colorit dalla regiun nua ch’el ha liug e perquei era vegnir organisaus da glieud da leu, l’uniun «La chanzun rumantscha» segidi secapescha. La surdada dall’organisaziun dil secund festival ha liug alla fin digl emprem festival dalla canzun romontscha.

La canzun romontscha duei viver

«Nus lein haver plascher dallas veglias canzuns romontschas e cantar ellas, mo ei sto adina puspei era dar enzatgei niev, schiglioc vivi buc ed enzacu eis ei mo pli museal», ha Scherrer declarau en discuors cun l’Agentura da novitads rumantscha. En quei senn ei il festival in liug ideal da sentupada per cantar, tgirar e promover la canzun. Per promover la canzun romontscha han ils organisaturs dil festival scret ora ina concurrenza da cumposiziun per novas canzuns romontschas per chors. La finamira ei da saver metter a disposiziun als chors romontschs ed a tuts chors interessai novas canzuns romontschas. Senza enconuscher ils cumponists ha ina giuria dil fatg selecziunau las canzuns ch’ein vegnidas inoltradas. Quellas vegnan presentadas la sonda, ils 16 da mars 2019. Al final dalla concurrenza da cumposiziun contan treis chors ad hoc mintgamai quater canzuns da mintga gener (chor d’affons, chor mischedau e chor viril) ch’ein vegnidas tschernidas e premiadas dalla giuria. Igl auditori astga era dar sia vusch alla canzun preferida che vegn la finfinala premiada. Tgei cumponists ch’ein el final dalla concurrenza duei restar tschelau tochen tier la premiaziun. Tenor Scherrer duei quella concurrenza per novas cumposiziuns restar in punct fix el program dil festival «La chanzun rumantscha».

Plattafuorma da canzuns

L’uniun «La chanzun rumantscha» vul scaffir ina scuntrada interromontscha che duei promover la musica romontscha en general, ed en special la canzun da chor. Per quei motiv ein novs commembers da tuttas regiuns adina beinvegni. La pagina d’internet dall’uniun duei plinavon esser ina plattafuorma ed in agid per dirigents, cantauturs e tut quels che tschercan canzuns romontschas, cumponists e notas. Cul temps duei ei esser pusseivel da secolligiar cun in link naven dalla pagina dall’uniun cun tontas paginas sco pusseivel che gidan vinavon d’anflar il tschercau. Aschia per exempel era culla pagina www.ict-atelier.ch che porscha gia ussa massa canzuns romontschas per chors. Leu san interessai tedlar las canzuns ed era cumprar e telecargar las notas. Quella pagina ei plinavon interessanta pils cumponists che vegnan remunerai per lur ovras.