Dapli letgs per meglierar la situaziun finanziala

Igl onn da fatschenta 2025/26 ei danovamein staus deficitars per las Pendicularas Mustér SA. Il surpli d’expensas importa rodund 1,2 milliuns francs. Il deficit ei per strusch in milliun francs pli aults ch’igl onn da fatschenta precedent. «Igl ei nossa finamira da scriver cefras neras», scriva il cussegl d’administraziun el rapport annual 2025/26. Igl onn da fatschenta passau ha cuzzau digl emprem da fenadur 2025 entochen ils 30 da zercladur 2026.

Dapli letgs – dapli frequenzas

Per meglierar la situaziun finanziala vesa il cussegl d’administraziun sulettamein la soluziun d’in pli grond diember da frequenzas: «Damai ch’ils projects da baghegiar ton ad Acla da Fontauna sco a Dieni vegnan retardai dils investurs, stuein nus procurar sezs per dapli letgs. La finamira ei da saver entscheiver a baghegiar primavera 2027», scriva il cussegl d’administraziun. L’engrondaziun dil Catrina Resort preveda in baghetg niev cun 250 entochen 300 letgs. Quella purschida duei star a disposiziun naven digl unviern 2028. «Senza quels letgs vegn ei ad esser grev da finanziar las pendicularas cul cash flow recaltgau da quellas», constatescha il cussegl d’administraziun cun Marcus Weber alla testa.

Cuosts da rodund 35 milliuns

«Il baghetg niev sigl areal dil Catrina Resort cuosta rodund 35 milliuns francs. El cuntegn habitaziuns da vacanzas, mo era 20 combras da hostel ed entginas habitaziuns per persunal», di il directur dallas Pendicularas Mustér SA Stefan Arnold. Il stil da quei baghetg duei ir aprau cullas casas existentas dil resort. «El decuors dils davos diesch onns ei semidau bein enqual caussa, era pertuccont architectura. Ei duei dar in baghetg modern el stil da tschellas casas», declara Stefan Arnold. Suenter che la planisaziun locala ei vegnida acceptada dil suveran da Mustér il november 2026, sto il plan d’areal ussa aunc vegnir approbaus dalla Regenza: «Il mument essan nus lundervi da semtgar ils documents per la damonda da baghegiar alla vischnaunca.»

Siat milliuns per ennevar e turbinar

Ella fasa finala dalla procedura da lubientscha ei tenor Stefan Arnold il project d’ennevar per la pista da Caischavedra a Sontga Catrina. Parallelamein duein ils indrezs per turbinar l’aua che vegn tschaffada per ennevar e che vegn buca nezegiada per quei intent vegnir realisai. «Nus quintein da survegnir las lubientschas el decuors digl october vegnent. Ils cuosts per quei entir project ein calculai cun rodund siat milliuns francs», di Stefan Arnold. La turbina per la producziun d’energia electrica duei vegnir installada sigl areal dil Catrina Resort en connex cul baghetg niev.

Success dalla stad ei luaus

«Deplorablamein ha la partenza egl unviern 2025/26 entschiet mal. Muort la schliat’aura ha il temps da Nadal schau luar il success dalla stagiun da stad», scriva il cussegl d’administraziun dallas Pendicularas Mustér SA ella retrospectiva sigl onn da fatschenta passau e constatescha: «Gest la stad 2025 ha denton mussau che nus essan enconuschents era sco destinaziun da stad. Mo aschia eis ei stau pusseivel da contonscher in cash flow malgrad il schliet unviern.» Il cash flow ha contonschiu la summa dad 1,37 milliuns francs.

Meglierar fatschenta da stad

«Deplorablamein ei la Surselva aunc memia pauc enconuschenta per vacanzas la stad. Quei malgrad che las pusseivladads pils hosps daventan adina meglieras. La part sura dalla Surselva e specialmein Mustér ha saviu augmentar siu grad d’enconuschientscha el cerchel dils bikers. Il success dil team da bike Thömus/Maxon attila adina dapli bikers a Mustér», constatescha il cussegl d’administraziun. Thömus/Maxon vegn sponsurau dallas Pendicularas Mustér SA. Las experientschas fatgas ils davos onns cun arver la stagiun da stad gia la fin da matg seigien fetg positivas.