Drivir la sauna e serrar il bogn roman-irlandais

Blers braman quist mumaint: A partir da sonda es la sauna dal Bogn Engiadina Scuol (BES) darcheu averta. Quella es gnüda renovada dürant ils ultims mais ed as preschainta uossa in ün nouv büschmaint. Sco cha Claudio ­Dusch­letta, directer dal Bogn Engiadina Scuol, quinta, es gnü realisà ün nouv bogn da Kneipp our i’l liber, üna nouva zona d’inscunter, ün nouv fuond e nouvas cabinas da sauna, duschas, fuorns e la tecnica cun ventilaziun ed iglüminaziun es gnüda rimplazzada.

«La sauna ha tschüf ün aspet visual cumplettamaing nouv, ma bleras lavurs sun eir gnüdas fattas davo las culissas, cha’l giast gnanca nu vezza», declera Claudio Duschletta. El es persvas cha’ls giasts vegnan remunerats per quists mais cha la sporta mancaiva, cun nouvas aventüras ed experienzas da sauna fich attractivas. Dürant il di da las portas avertas in sonda pudarà minchün as persvader dals müdamaints. Vers saira ha lura lö la prüma infusiun illa nouva sauna dal Bogn Engiadina Scuol.

Program da fabrica stret ed intensiv

Fin chi’d es uschè inavant tocca la nouva sauna amo a la mansteranza per las lavurs finalas. «Il program da fabrica es stat fich stret ed intensiv per tuots», declera il directer dal BES, «nus vain planisà fich bain e la mansteranza, per gronda part indigena, ha fat buna lavur.» Cha intant cha’ls mansterans bandunan il plazzal da fabrica, vegnan exercitats e testats ils nouvs indrizs. Cha eir ils maisters da sauna stopchan amo exercitar lur infusiuns per cha tuot saja pront e perfet pel di d’avertüra. «E lura eschan punctualmaing pronts per la stagiun d’utuon», disch Claudio Duschletta.

Ch’el haja gnü bleras reacziuns da persunas chi braman la nouva sauna. Als 13 avrigl ha serrà il BES las portas per realisar la revisiun vasta e per las investiziuns illa sporta da sauna. Il bogn svess es avert darcheu daspö ils 13 mai, unicamaing la partiziun da la sauna es statta serrada inavant e fin uossa. Tuot insembel sun gnüts investits quist on var quatter milliuns francs i’l BES.

Las prosmas investiziuns dal 2028

Cuort avant la reavertüra da sonda ha il directer dal BES orientà eir davart ils prossems pass da svilup. Causa cha la visiun «Avegnir Infra Scuol» cun ün ingrondimaint dal Bogn Engiadina Scuol cun nouvs batschigls e sportas d’uffants nu po our da motivs finanzials gnir realisada, ha il cussagl administrativ decis da far pass plü pitschens chi vegnan finanziats our da l’aigna gestiun. Il BES ha üna cunvegna da prestaziun cul cumün da Scuol chi düra fin dal 2030 e chi pussibiltescha eir tschertas investiziuns in roms survisibels.

Il prossem pass es da serrar definitivamaing la sporta roman-irlandaisa in avrigl 2028 – e da realisar in quel lö lura üna partiziun da silenzi reservada als creschüts. «Nus vain adüna darcheu reacziuns chi manca actualmaing ün lö da quietezza per as retrar e star pachific. Perquai laina realisar quai uossa in prüma priorità», declera Claudio Duschletta. «Per realisar quist’idea pudaina trar a nüz eir ils batschigls existents dal bogn roman-irlandais», agiundscha’l.

Per quist pass da svilup fan ils respunsabels quint cun cuosts da raduond 1,8 milliuns francs. Cumprais in quistas investiziuns dal 2028 es eir la sanaziun dal tet existent. «Quistas investiziuns nun impedischan neir ün svilup futur», quinta il directer e manaja cha davo quellas investiziuns saja il BES lura à jour per ils prossems 10–15 ons.