Ritgezza dad indesch vischnancas
Glieud fitg ritga paja taglias en l’Engiadin’Ota e da quai profiteschan las vischnancas paupras dal Grischun. Co mantegnair la ritgezza da questas vischnancas? Gliez è stada la dumonda d’ina intervenziun tractada il mardi en il Cussegl grond.
Las cifras impressiuneschan. Adina pli ritgas èn daventadas las indesch vischnancas da l’Engiadin’Ota durant ils davos onns. Perquai pajan ellas era adina dapli en la gulivaziun da finanzas. Da lezza profiteschan autras vischnancas cun paucs daners.
Da 13 sin 19 milliuns francs è creschì durant ils ultims trais onns l’import che l’Engiadin’Ota ha da pajar. Las indesch vischnancas han uschia contribuì 60 fin 70 % da l’entira summa da la gulivaziun da finanzas. Gliez è bler en vista al fatg che be 8 % da la populaziun grischuna viva en la regiun.
Co segirar il substrat finanzial da questa regiun? E datti atgnamain ina analisa da ristg, sch’il Grischun dependa finanzialmain memia fitg da las indesch vischnancas? Ina intervenziun tractada il mardi en il Cussegl grond ha pretendì scleriment.
Daners vegnan cunzunt da San Murezzan
Ins renconuschia l’impurtanza da l’Engiadin’Ota per la forza economica dal Grischun, respunda la Regenza en scrit. Oravant tut San Murezzan contribueschia bler. 20 % da las entradas da taglias chantunalas derivian da questa regiun.
La gulivaziun da finanzas na frainia betg la dinamica economica da las indesch vischnancas, gliez mussian las cifras dals ultims onns.
87 % da las taglias pauschalas
Era sche l’Engiadin’Ota cun San Murezzan prestia la pli gronda summa en la gulivaziun, na possian ins betg discurrer d’ina dependenza finanziala, scriva la Regenza. En pli gidia era il Chantun la regiun, per exempel cun sustegnair la plazza aviatica a Samedan ubain cun s’engaschar da mantegnair la taglia pauschala.
La taglia pauschala saja «ina funtauna d’entradas relevanta per l’Engiadin’Ota ed il chantun». 87 % da las taglias pauschalas incassadas il 2025 derivan da questa regiun.
Taglia pauschala pon pajar be persunas ritgas cun dretg da burgais en l’exteriur. Enstagl ch’ellas vegnan imponidas tenor lur entradas e lur facultad, pajan els taglia be sin fundament da lur expensas.
I duvrass analisa da ristg
Martin Binkert dal Center ha crititgà ch’il Chantun n’haja nagina analisa da ristg, gliez resortia da las respostas. En vista a la muntada finanziala da la regiun duvrassi ina tala e cunzunt er perquai che l’Engiadin’Ota saja dependenta dal turissem e da cunfinaris sco forzas da lavur.
Gust da leger dapli?