Veraina – debatta emoziunala

Betg cuntentaivla saja la situaziun per indigens ed indigenas che giajan l’enviern cun l’auto tras il Vereina, stat scrit en l’incumbensa tractada il mardi en il Cussegl grond. La malcuntentientscha pertutga ils pretschs per il transport d’autos tras il tunnel. I dat bain differents sistems da rabat.

Ma ils rabats, finanziads da la Viafier retica, sajan memia cumplitgads u portian memia pauc, crititgescha l’intervenziun e pretenda: Il Chantun duai subvenziunar ulteriurs rabats. Ils indigens e las indigenas da l’Engiadina Bassa, la Val Müstair e da La Plaiv duain profitar dals rabats.

«Dumonda existenziala»

La Regenza ha mussà chapientscha, ma è s’exprimida encunter: Per l’ina saja quai difficil da definir, tgi che saja in indigen u ina indigena. Per l’autra n’existia nagina basa legala per talas subvenziuns.

Rico Lamprecht dal Center n’ha betg laschà valair l’argument ch’ins na possia betg definir, tgi ch’è indigen e tgi betg. La citad da Turitg introduceschia era in bigliet favuraivel per indigens, lura giaja quai bain era per il Veraina.

Duosch Fadri Felix da la PLD ha tegnì in pled emoziunal: «Per nus n’è il Veraina betg simplamain ina soluziun da luxus turistica, mabain durant l’enviern la suletta colliaziun segira en direcziun da Cuira.» Riet Denoth da la PPS ha era laschà sentir ses displaschair: «Per ils mastergnants n’è il Veraina betg be ina varianta cumadaivla, mabain ina colliaziun che segirescha l’existenza.»

Ils deputads e las deputadas da l’Engiadina Bassa e da la Val Müstair han insistì che betg mo la Viafier retica, mabain era il Chantun stoppia subvenziunar rabats. Strusch in votum è s’exprimì encunter. Cun 65 cunter 42 vuschs e tschintg abstenziuns ha il Cussegl grond incumbensà la Regenza dad instradar tals rabats.