In’ura magica cun Edvina, Lexi e Merlin

La Kornhausbibliothek sa chatta amez la citad veglia da Berna. Igl è in edifizi imposant ch’ins savess bunamain scumbigliar cun in chastè – in chastè magic, almain durant in’ura la davosa sonda avantmezdi.

Ina stria prelegia

En in chantun da la biblioteca a Berna, tranter batgettas magicas, zitgas ed ina gruppa da var diesch uffants, sesa l’autura Viola Cadruvi cun chapè e mantel. «Quai è il pli grond striegn che jau hai fatg l’ultim onn», di Viola Cadruvi e mussa sin ses cudesch. Ils uffants èn gia ussa captivads, avant che la prelecziun ha insumma cumenzà.

L’uniun Inscunters rumantschs Berna​ ha envidà Viola Cadruvi da preleger or da ses nov cudesch «Il chastè magic – Das Zauberschloss». Las set istorgias accumpognan Edvina, Lexi e Merlin che vivan en in chastè magic lontan si en las muntognas, nua ch’els emprendan a striunar.

Ils uffants a Berna taidlan cun mirveglias sco che l’autura raquinta da las dialas da naiv e dal trol da muntogna cun otg bratschs. In highlight è l’istorgia dal nanin alpin che è tut schenà pervi dad in problem in pau penibel. Cun magia, umor e blera cumpassiun san ils trais amis dentant gidar ad el.

«Horca la torta»

Las istorgias ha Viola Cadruvi inventà e raquintà a sias figlias, sco ch’ella raquinta suenter la prelecziun. «Cumenzà a quai cun caracters da Harry Potter», tradescha l’autura che ama istorgias fantasticas. Cun da raquintar hajan las figuras pli e pli survegnì lur agen caracters ed uschia sajan londeror daventadas Edvina, la perderta, Merlin, igl legher, e Lexi, la curaschusa. Ella haja perfin gì ina glista da pleds per mintga figura, tradescha l’autura. Merlin per exempel cloma «Horca la torta» sch’el è surprais.

In cudesch biling

Las istorgias èn scrittas en rumantsch grischun e tudestg. Sco che l’autura declera, tschernan bleras persunas plitost cudeschs en lur idioms. La versiun bilingua duaja gidar da surmuntar quest «obstachel» dal rumantsch grischun che bleras persunas hajan, di ella. A la fin finala saja sumegliant sco in cudesch en tudestg da scrittira che vegnia prelegì en dialect. «Quai funcziuna gist uschè bain cun il rumantsch grischun. Ultra da quai gidan era las illustraziuns enormamain.»

Las istorgias survegnan colur

Igl cudesch è vegnì illustrà dad Oleksandra Gorshevikova che lavura ensemen cun Viola Cadruvi tar Studio Toc. Viola Cadruvi raquinta ch’ella aveva en il chau sco che mintga detagl duess vesair or – tochen tar la colur da las stailas sin il sumbrival dal letg d’Edvina. Sin basa da skizzas da Viola Cadruvi ha l’illustratura alura stgaffì ils maletgs cun blers detagls ed anc dapli fantasia.

I saja bain insatge spezial, sche insatgi malegia exact quai ch’ins aveva s’imaginà. «Quai era in pau sco sch’ella fiss stada en mes chau», sa regorda Viola Cadruvi da la collavuraziun creativa cun Oleksandra Gorshevikova.

Las figuras survegnan ina vusch

«Jau hai pensà che quellas istorgias fissan uschè bain adattadas per in gieu auditiv cun bler dialog e tantas figuras.» Viola Cadruvi quinta ch’ella haja perquai contactà RTR che saja lura spert stà da la partida da crear in gieu auditiv. Uschia ha Viola Cadruvi scrit il scenari per il gieu auditiv. En il studio da registraziun ha ella alura manà reschia. «Jau hai era fatg ils tuns», agiunscha ella cun in surrir e dat era gest in exempel cun suflar a la palma dal maun: «Pfffrrt!»

RTR haja tschernì ils pledaders e las pledadras – tranter auter Michel Decurtins, Fabia Caduff ed Olivia Spinatsch – e transponì il text en lur idioms. Uschia è resultà in gieu auditiv interidiomatic. «Jau era bain in zic loscha che Michel Decurtins pledescha ina da las mias figuras», di Viola Cadruvi ch’è entusiasmada co ch’ils pledaders e las pledadras han dà vita a las figuras.

I dat bler da scuvrir

Per creschids ed uffants na datti betg mo da scuvrir bellas expressiuns sco «Abracaditg, abracafatg» mabain era diversas allusiuns ad istorgias da fantasy e ditgas grischunas. Tgi che legia las aventuras dad Edvina, Lexi e Merlin senta che l’autura ha gì grond plaschair da crear las figuras ed il mund magic. Ussa spetgan ellas da vegnir scuvertas dad in e mintgina – saja quai cun leger il cudesch u tadlar il gieu auditiv.