Dispita da chatscha – 1:0 per RTR

Betg mo en ils guauds ed en las muntognas sa splega la chatscha grischuna. Era sin RTR vegnan chatschadurs e chatschaduras durant l’atun sin lur custs. La chasa da medias porscha en il radio u online suandants formats:

• «La preda» per annunziar animals sajettads – la fin da la stagiun gudogna insatgi ina patenta da chatscha
• «Salids da chatscha» per gratular a chatschadurs cun salids musicals
• Fotogallaria cun predas

Per tgi che ha disgust dad animals morts u ha ina tenuta critica envers la chatscha, è quai tut auter ch’in plaschair. La cuminanza d’interess «IG Wild beim Wild» ha perquai reclamà la fin da settember tar il post da mediaziun independent. L’emna passada ha il mediatur responsabel, Toni Hess, tramess ses rapport ad RTR ed a la cuminanza d’interess. En il rapport stat scrit che la reclamaziun saja nungiustifitgada – ina absoluziun per RTR.

Gia tratg vinavant a l’UBI

Ma l’absoluziun è da curta durada. La «IG Wild beim Wild» ha gia tratg vinavant la chaussa. «La procedura è en il fratemp pendenta tar l’Autoritad independenta da recurs davart radio e televisiun (UBI)», scriva la cuminanza d’interess en in e-mail a la FMR. Entant ch’il post da mediaziun po be recumandar u intermediar, è l’UBI ina sort dretgira. Tge ch’ella decida è liant.

Ils puncts principals che la «IG Wild» renfatscha ad RTR èn:

• bagatellisar violenza
• betg proteger la giuventetgna
• betg esser objectiv puncto chatscha
• tscherts avis vegnan a la curta
• intransparenza puncto premi cun la patenta da chatscha

Il giurist e mediatur Toni Hess entra detagliadamain sin la critica – e la valitescha sco nungiustifitgada. Il rapport è dal reminent publitgà sin la pagina da la SRG SSR Svizra rumantscha.

Mazzar animals sco gieu

«L’emissiun ‹La Preda› fa in gieu da publicum or dal mazzar selvaschinas», renfatscha la «IG Wild beim Wild». Era la fotogallaria – in maletg mussa per exempel in tiradur surriend sper in tschierv mort – muntia ina bagatellisaziun sche betg perfin ina glorificaziun da violenza.

La chatscha da patenta saja legala en il Grischun e cumbinada cun ina lunga tradiziun, replica il mediatur en ses rapport. Las emissiuns dad RTR n’intimeschian betg da mazzar u dad exequir violenza. Las fotografias publitgadas sajan fatgas cun respect visavi ils animals sajettads. Ins na vesia nagina painas u blessuras. «Jau na percorsch betg che RTR avess bagatellisà la violenza envers animals cun la fotogallaria», scriva Toni Hess – e fa a medem mument attent als cunfins da sias cumpetenzas: La dumonda, sch’ina tala fotogallaria duai insumma vegnir publitgada, na possia il mediatur betg respunder. Gliez stettia en plaina cumpetenza ed en la libertad da la redacziun.

Dus principis cardinals

Tenor lescha sto RTR – sco era las autras unitads da la SRG SSR – esser objectiv e respectar ils divers avis. En il jargon giuridic vegn discurrì dal principi d’objectivitad e dal principi da diversitad. Cun preschentar emnas a la lunga la chatscha sco «pli bel temp da l’onn» sajan las vistas criticas vegnidas a la curta, recloma la «IG Wild beim Wild».

RTR ha sa chapescha pudì prender posiziun tar tuttas renfatschas, avant ch’il mediatur ha scrit ses rapport. Puncto renfatscha da betg esser objectiv sa dosta RTR cun enumerar tschintg contribuziuns emessas il 2026 che cuntegnian elements critics davart chatscha.

Il mediatur differenziescha che l’obligaziun dad esser objectiv valia cunzunt per emissiuns d’infurmaziun. «La preda» ubain la fotogallaria tutgian però tar il program accumpagnant dad RTR e betg tar l’infurmaziun.

Ed il segund principi, che pretenda da resguardar differents avis, na sa refereschia betg sin singulas emissiuns, mabain sin l’entir program, stat scrit en il rapport. Quest principi saja pir lura violà, sche autras tenutas vegnian sistematicamain excludidas dal program.

En las tschintg contribuziuns enumeradas dad RTR vegnian resguardadas era autras vistas, concluda il rapport. Era il film da «Cuntrasts» emess pir dacurt davart l’expert da lufs Peter A. Dettling saja in exempel per vistas che na plaschian betg exnum a chatschadurs e chatschaduras.

Intransparenza tar premi

Ina ulteriura reprimanda dad «IG Wild beim Wild»: En l’emissiun «La preda» manchia in cler avis tgi che finanzieschia insumma il premi cun la patenta da chatscha. En sia posiziun – medemamain publitgada en il rapport da mediaziun – conferma RTR ch’il premi vegnia finanzià da la Banca Chantunala Grischuna. Ins veglia anc controllar ch’il sponsur vegnia propi era numnà en tuttas contribuziuns online.

En pli crititgescha la cuminanza d’interess che RTR na protegia betg ils uffants e giuvenils cun mussar senza barrieras fotografias da selvaschinas mortas. Il mediatur Toni Hess concluda: Ils maletgs da predas tutgian tar la «realitad da vita». Els na pericliteschian betg il svilup fisic, psichic u moral da minorens.