In nov concept per il sport a Bual

Entaifer gnanc 20 onns è Lantsch daventà in center da biatlon da muntada naziunala ed internaziunala (guarda box). Il punct culminant è stà il campiunadi mundial il favrer 2025: Davant radund 85 000 aspectaturas ed aspectaturs è l’elita da biatlon sa mesirada durant duas emnas en ed enturn l’arena a Bual.

«Nus essan loschs da quest svilup», ha il schef da sport tar Swiss Ski Walter Reusser perquai constatà mesemna durant ina saira d’infurmaziun a Lantsch. Il tema è stà l’avegnir da l’arena da biatlon. Pertge malgrà il cuntanschì fetschia basegn d’agir: «L’arena ha tschertas limitas. Per restar relevant en il mund da biatlon dovri in svilup.» Vul dir che l’areal a Bual cun il Nordic House duai vegnir reconcepì da fund ensi e daventar in center da sport modern.

L’arena fa deficits

Tenor il concept preschentà mesemna saira è ina da las finamiras pia d’optimar las cundiziuns per trenaments e concurrenzas da passlung e biatlon. Previs èn tranter auter spazis da trenament a l’intern ed ina purschida da medischina e diagnostica da sport. «Tuttina è be in quart da l’infrastructura reservà per il sport da prestaziun», ha Emanuel Sulser ditg. Sco represchentant da Meter über Meer, la fatschenta ch’ha elavurà il concept, ha el explitgà ils plans: «Ina gronda part da l’indriz è entant reservada per hotellaria e gastronomia.» Ed insumma na sa drizzia il project betg be al sport da prestaziun. I saja in center per tuttas e tuts, pia era per il sport da massa.

Uschia duai il nov center era porscher ina plivalur a la regiun ed esser supportabel economicamain. Pertge actualmain chaschunia l’arena da biatlon in deficit, sco che Walter Reusser ha explitgà: «Swiss Ski sto mintg’onn impunder daners en il manaschi da l’arena, daners che nus investissan pli gugent en il sport.» Cifras concretas n’ha Walter Reusser era sin dumonda da la FMR betg communitgà.

Il Nordic House sto far plazza

Nagina plazza en ils plans da Swiss Ski e Meter über Meer n’ha entant il Nordic House. «Nus avain empruvà d’integrar quest edifizi en il nov concept. Ma el n’ademplescha betg ils basegns», ha Emanuel Sulser explitgà envers la FMR. Il nov project sto numnadamain resguardar il plan d’areal che vala gia uss e nizzegiar il spazi uschè bain sco pussibel. «Nus stuain construir ad aut ed a bass», ha Walter Reusser constatà. Previs èsi damai era da construir in parcadi sutterran sur dus plauns.

Per il Nordic House na muntass quai però betg la fin. «Quest edifizi è construì uschia ch’el po vegnir disfatg e reconstruì en in nov lieu», ha Emanuel Sulser ditg. Interessents per il Nordic House hajan ins gia chattà. Infurmaziuns pli concretas veglian ins però anc betg dar.

La vischnanca decida sco proxim

Tenor il plan da Swiss Ski e Meter über Meer resta il Nordic House però entant anc a Bual. La finamira è da cumenzar cun las lavurs la primavaira 2028. Pia pir suenter las proximas cursas da la cuppa mundiala da biatlon che han lieu il medem onn.

Per ch’il project possia vegnir realisà, sto sco proxim dentant la vischnanca dar glisch verda. Il nov center – almain uschia sco ch’el è concepì – pretenda numnadamain ina revisiun parziala da la lescha da bajegiar e da las prescripziuns pertutgant il plan d’areal per la zona Bual. En particular pussibilitescha la revisiun da realisar manaschis d’alloschament turistics. Da realisar emprimas e segundas abitaziuns resta però vinavant sclaus. Ils documents correspundents èn exponids sin la pagina da la vischnanca Lantsch per la fasa da cooperaziun fin ils 16 da november 2026. Sur da la revisiun decida la radunanza communala da Lantsch ils 10 da december 2026.

Proxim punct culminant

Sche tut gartegia sco planisà vegniss la concurrenza per il project scrit ora la primavaira 2027. E pir cura ch’ins haja chattà in victur, possian ins era communitgar ils custs per il nov center, uschia Emanuel Sulser: «A maun dal concept savain nus, quant ch’i vegn a custar pli u main. Ina cifra concreta na communitgain nus però anc betg.» Per pudair finanziar il center da sport quinta Swiss Ski dentant cun investiziuns da privats e cun il sustegn da Chantun e Confederaziun, quai sur ils concepts per implants da sport d’impurtanza naziunala (NASAK) e chantunala (KASAK).

Che l’arena da biatlon da Lantsch duai restar in implant impurtant, quai è pia cler per Swiss Ski. «Nus vulain nizzegiar l’enorm potenzial ed uschia restar relevant tar l’uniun internaziunala da biatlon», ha era la vicepresidenta da Swiss Ski Tamara Wolf punctuà. En egl n’ha ella però betg mo il project actual. Tar Swiss Ski – sco era tar ils ulteriurs partenaris – speran ins era gia sin il gieus olimpics en Svizra il 2038, e quai cun cursas da biatlon en in center modern a Lantsch – il proxim punct culminant pia.