L’Agenda 2030 es gnüda actualisada

(anr/fa) Da l’on 2015 han ils partenaris regiunals da l’Engiadina Bassa defini ils böts chi’s voul ragiundscher fin da l’on 2030. Quists böts sun cuntgnüts ill’Agenda 2030. Duos jadas l’on as chatta la trentina da commembers dal Forum Engiadina Bassa e Val Müstair (EBVM) per examinar masüras chi güdan a promouver l’economia illa Regiun EBVM. A la sezzüda d’incuort i’l local cultural dal Bogn Engiadina Scuol staiva la strategia pel svilup regiunal cuntgnüda ill’Agenda 2030. In quist documaint cha’ls partenaris regiunals vaivan elavurà avant trais on sun fixats ils böts strategics chi’s voul ragiundscher fin da l’on 2030. In lur sezzüda han ils commembers dal Forum EBVM examinà ils böts e tils actualisats ingio chi faiva dabsögn. Id han eir guardà ingio chi dess potenzial per optimar amo las sportas. Il forum chi ha üna trentina da commembers da tuot las differentas branschas vain presidià da Philipp Gunzinger. Preschaintas d’eiran eir la sviluppadra regiunala Martina Schlappbach e Martina Stadler chi maina il turissem regiunal.

pagina 11