Finalmain in nov president

Cun passas 70 persunas ch’èn vegnidas ensemen l’emna passada a Donat per la radunanza communala da la vischnanca Muntogna da Schons è l’interess stà uschè grond sco anc darar. Discussiuns pli grondas n’hai dentant dà naginas. Cun 64 da 75 vuschs è Gian Michael da Donat vegnì elegì sco nov president communal. Ed en quest cas pon ins constatar: Il vegl è il nov.

Avant la fusiun è l’um da 59 onns numnadamain stà dal 2005 fin il 2014 president communal da Donat. El haja ditg ponderà, sch’el dess sa metter a disposiziun: «Jau sun dal parairi ch’ins ha ussa chavà or puspè in vegl, in ’grufti’ forsa. Jau n’avess gì nagut encunter forzas frestgas giuvnas.» Cunquai ch’el haja dà giu intgins uffizis e sia figlia saja turnada a Donat per far da pura, haja el ussa temp per la lavur sco president communal.

Forzas giuvnas e veglias

Era sch’il nov president è ina veglia vulp: I dat era novas forzas frestgas giuvnas en suprastanza cun Christian Fravi da Donat e Mirco Sutter da Maton. Tenor Gian Michael possia quai esser in bun mix d’experientschas e forzas giuvnas. El agiuntescha: «I n’è betg uschia che jau stoss far quai, ma jau m’allegrel sin l’uffizi che jau hai survegnì.» Ils ultims 16 onns è Gian Michael stà deputà dal Cussegl grond per la partida dal Center. Tenor el è l’experientscha en la politica chantunala in avantatg per ses nov post. Vi da la politica communala plascha ad el surtut ch’ella saja bler pli directa che la politica chantunala.

Marco Dolf è levgià

Il president partent Marco Dolf è suenter sia davosa radunanza communala levgià ch’igl è gartegià da chattar in successur. I saja stà sia finamira da chalar sin la fin da questa perioda d’uffizi. Atgnamain ha el gia avant trais onns vulì dar giu ses post, ma perquai ch’i n’è betg gartegià da chattar insatgi che sa metta a disposiziun ha el anc ina giada fatg ina perioda d’uffizi. Avant la fusiun il 2021 è Marco Dolf stà president communal da Casti-Vargistagn. Suenter passa 20 onns en la politica communala saja nairas uras per el da chalar. El haja emprendì ina massa durant tut quels onns: «Jau hai adina fatg gugent la lavur sco president communal – l’etichetta uffiziala da president n’hai jau dentant mai gì gugent.» El sa legria ussa d’avair dapli temp per ses manaschi puril. E surtut per ina chaussa na vegnia el insumma betg a laschar encrescher: «Jau sun cuntent, sche jau na stoss betg pli ir a las numerusas radunanzas da delegads cun quels aperos. Quai hai jau vis per mia vita e quels na dovr jau betg pli», di Marco Dolf cun in surrir.