Uossa es dumandada la populaziun

Daspö ündesch ons exista il cumün da Zernez fusiunà. Amo hoz però lavura il büro da fabrica cullas trais ledschas da fabrica da Zernez, Susch e Lavin sco eir correspundentamaing cun differents plans da zonas. Tenor il parsura da la cumischiun da planisaziun e suprastant cumünal Duosch Städler esa perquai ura e strasura d’unifichar quistas ledschas in ün’unica. Culla revisiun totala da la planisaziun locala gnia quella lura eir güsta adattada a las pretaisas superiuras da la ledscha naziunala da planisaziun locala (Raumplanungsgesetz RPG 1), fatta buna dal suveran svizzer dal 2013 a l’urna. Uschea es gnüda infuormada la populaziun in marcurdi saira a Zernez.

90 dis procedura da cooperaziun

Amo fin als 17 schner 2027 es averta la procedura da cooperaziun in chosa. Dürant quist temp ha minchün e minchüna – votanta ed abitant dal cumün da Zernez o na – l’occasiun d’inoltrar al cumün in scrit propostas e giavüschs in connex culla planisaziun locala. Per pudair contemplar actas e plans correspundents sta a disposiziun la documainta in l’aula da la chasa cumünala a Zernez e quai adüna dürant las uras d’avertüra da la chanzlia cumünala.

Tuot las actas sun eir accessiblas sülla pagina d’internet dal cumün. Implü daja sün reservaziun e cunvegna eir la pussibiltà da’s laschar infuormar individualmaing, quai als 17 november e, tenor necessità, eir amo als 11 december.

Che vain insomma adattà?

Tenor il president cumünal Domenic Toutsch es la planisaziun sco tala üna basa importanta pel svilup futur da las fracziuns dal cumün da Zernez: «Ella definischa, ingio chi’s po abitar, lavurar e fabrichar e co chi’s va intuorn cul terrain da fabrica e culla cuntrada.» Chi saja tant plü important, d’integrar la populaziun i’l process da planisaziun e partecipaziun, ha’l agiunt.

In sia introducziun ha rendü Duosch Städler attent a las pretaisas dal Chantun chi sforzan als cumüns cun zonas da fabrica surdimensiunadas da redüer las reservas da terrain da fabrica massivamaing. El ha dit, cha’l cumün da Zernez posseda actualmaing 7,6 hectaras terrain da fabrica na surfabrichadas. Tenor il quint dal Chantun stuvess Zernez redüer quella surfatscha sün amo var 16 plazzas da fabrica cun üna surfatscha totala da be amo üna hectara, e quai in tuottas quatter fracziuns.

«Nossa proposta invezza prevezza 3,5 hectaras reservas», uschea Duosch Städler, «alch chi sarà amo d’argumantar invers ils uffizis chantunals.» Ün argumaint a favur dal cumün pudess esser l’interpretaziun da las cifras da la populaziun stabla i’l cumün da Zernez ed il svilup da quellas. Quia exista nempe üna discrepanza tanter la valütaziun dal Chantun a reguard il svilup da la populaziun e la vista dal cumün svessa, bainquant plü optimistica.

Il focus da la revisiun locala as drizza sün l’ütilisaziun dal territori abitabel e sül svilup da tal invers inaint. La basa strategica vain fuormada dal model directiv, l’uschè nomnà «Kommunales Räumliches Leitbild» (KRL) e dals böts da tal, elavurà a Zernez dal 2022. La revisiun locala prevezza sülla basa da drets e ledschas superiuras quatter böts e cuntgnüts principals: üna planisaziun locala confuorma al RPG 1, garantir la disponibilità da terrain da fabrica, mantegner e promouver abitaziuns primaras e mantegner ils minzs istorics dals cumüns.

Che sun ils prossems pass?

In quel reguard pretenda il RPG 1 eir da fixar las zonas da fabrica uschea cha quellas bastan per ün’ütilisaziun previsibla pels prossems 15 ons. Zonas da fabrica surdimensiunadas han da gnir redottas ed il cumün sto eir trar masüras cunter il mantunar terrain da fabrica, dimena masüras per la mobilisaziun da talas parcellas da fabrica. Il planisader cumünal Dominik Rüegg dal büro per svilup dal territori Stauffer & Studach a Cuoira ha declerà in marcurdi tuot ils detagls importants da la planisaziun locala pass per pass.

Scha’l proceder cuntinua sco previs da las instanzas cumünalas, lura dessa üna radunanza cumünala dürant l’avrigl da l’on chi vain per discutar e decider davart la revisiun totala surlavurada a man da las entradas da la procedura da cooperaziun cun üna votumaziun a l’urna. Quella dess avair lö als 6 gün 2027. Premiss la glüm verda dal suveran segua l’inoltraziun pro’l Chantun. L’approvaziun da la revisiun da la planisaziun locala tras la regenza chantunala pudess uschea esser avantman il plü bod per la fin da l’on chi vain.