Lectura Rumantscha

Betg gist scappar – i va oz per la planisaziun locala che po però esser pulit gustusa. E lura per nums locals bunamain aristocratics e per in president ed in roman ch’ins ha «fatg giu la pulvra».

La mustarda democratica a Zernez

I n’è betg gist in chavazzin ch’attira l’attenziun, il cuntrari – la planisaziun locala. Ma atgnamain è quel proceder che dura mainsvart ditg e para sitg e birocratic in segn da democrazia. Zernez è gist da reveder quella «stoda» planisaziun – il terren da construcziun sto tranter auter vegnir sminuì. Però tut democratic dastga l’entira populaziun dar actualmain sia mustarda tar quel process. Tar tut la mustarda èsi dentant da far attenziun che la liongia, stgisai la planisaziun na vegnia betg fraida.

Sissi en Val Medel

En la Val Medel n’è betg la planisaziun, mabain la denominaziun locala tema. In nov cudesch s’occupa cun ina pluna nums locals sco Magliaccas, La Saissa u era fitg imperial Sissi. Blers da quels nums na vegnan betg pli duvrads, ma il num Sissi pudess forsa schon anc avair survivì cun ina tala numalina.

Il «grufti» da la Muntogna da Schons

Finalmain po Marco Dolf dar giu il presidi da la Muntogna da Schons. El vuleva gea gia chalar avant in pèr onns, mo nagin n’ha vulì surpigliar in post. Ussa vegn in «grufti», sco el di sez, al timun, numnadamain Gian Michael. El ha gust da sa fatschentar cun las fatschentas communalas – e forsa era cun la planisaziun locala.

Veronica en sia «praschun»

E la fin anc in tema distatgà da vischnancas e lur planisaziuns e presidis. Ussa vai per il roman «Carschen uost» dad Imelda Coray-Monn  (1933 – 2009). Passa 40 onns ha el stuì spetgar da vegnir edì. Noss redactur Guillermo Á. Sellán ha legì l’istorgia da Veronica, ina «praschuniera» en ses mintgadi da dunnas, e chatta ch’igl è stà nairas uras ch’insatgi ha scuvert quest cudesch.

A revair e bun divertiment cun la Lectura Rumantscha!