Habitaziuns, caffè ni cultura – mo negins speculants
Avon in onn ha il suveran da Mustér concediu in credit da treis milliuns francs pil possess da terren e baghetgs dalla famiglia Couchepin. Il coc da quel ei la casa ed igl areal amiez il vitg. Tgei duei succeder cul baghetg e la surfatscha verda? Il venderdis sera ei vegniu discussiunau a Mustér davart quella damonda. Biaras ideas ein sin meisa: Liug da sentupada cun caffè ni ustria, habitaziuns pagablas pils giuvens, liug da cultura ed arranschaments. En mintga cass duei la vischnaunca impedir che speculants vegnien el giug.
Apparentamein ei la sentupada dil venderdis sera en halla Cons stada ina necessitad. Rodund 100 persunas ein suandadas igl invit dalla suprastonza communala da vegnir leu e discutar davart igl avegnir digl areal Hess/Couchepin amiez il vitg da Mustér. Suenter in’informaziun fundamentala dil president communal René Epp, dil canzlist da vischnaunca Roland Cajacob e dil cussegliader Beat Aliesch han vischinas e vischins giu la caschun da s’exprimer. Quella ga buc a bucca, mobein a scret. Sin plirs stans ein variantas vegnidas exponidas, cumbinadas cun damondas. Leu ha in e scadin saviu nudar ses giavischs e sias ideas pil curtgin e per la casa. Igl entir areal mesira rodund 3000 meters quadrats.
Areal che mintgin enconuscha
Igl areal Hess/Couchepin sesanfla amiez il vitg. Mintga vischina e vischin ei passaus leu tschiens ga e ha probabel fatg patratgs davart quella surfatscha cun grond potenzial. Per quei motiv fa ei lu era buca surstar che la vischnaunca ha rimnau il venderdis sera biaras ideas e giavischs. Aschia savessen casa e curtgins survir igl avegnir per exempel sco:
- plaz da sentupada per arranschaments culturals sco concerts e fiastas
- spazi da habitar, per exempel habitaziuns pagablas per glieud giuvna
- casa da cultura cun spazi verd
- parc da sedivertir cun in laghet
- liug per co-working
- caffè ni ustria cun terrassa ni reactivar la Stiva Diva
- grond parcadi sutterran
- buna colligiaziun culla plazza dalla staziun da viafier.
Differentas vischinas e vischins ein s’exprimi davart il possess futur digl areal, respectivamein la damonda d’involver investurs. Leu semuossa ch’ina part digl areal savess per exempel vegnir messa a disposiziun en dretg da baghegiar. En mintga cass astgi la parcella buca vegnir els mauns da speculants. La damonda, con dalla parcella che duei vegnir surbaghegiau, ei vegnida rispundida differentamein. Probabel savess ina part dil curtgin per in object niev cattar accoglientscha. Pia, schar miez sco curtgin e l’autra mesadad per in object niev.
Impurtont project
Il november 2025 han vischinas e vischins concediu in credit da treis milliuns francs per la cumpra dil possess dalla famiglia Couchepin. La vischnaunca ha vuliu segirar surtut la parcella amiez il vitg cun ina casa ed in grond curtgin. Quella ei lu era la part essenziala da quei possess. Il venderdis ei suandada l’emprema occurrenza da participaziun, ina secunda duei suandar primavera proxima. «Ils 2 da december 2026 vegn il contract da cumpra dil possess suttascrets», ha il president communal René Epp detg alla sentupada en halla Cons e puntuau: «Quei areal ei il pli impurtont project da svilup dalla vischnaunca dapi decennis. Nus havein l’unica caschun da formar il center dil vitg.» Da vischinas e vischins veglien ins saver, tgei ideas ch’ellas ed els hagien per far il vitg pli attractivs, sch’ins vegli commerci ni gastronomia en quei liug. Lu era schebein la vischnaunca duei investar ni sch’ins duei tschercar investurs. Cuortamein ei René Epp era s’exprimius pertuccont il concuors dall’Immo Invest Partner AG, igl investur dil hotel Acla da Fontauna (mira box).
Risguard dalla basa legala
Roland Cajacob ha dilucidau cuortamein la basa legala dalla parcella: «La vischnaunca ha giu formulau ina strategia pigl areal Hess el maletg directiv. Ussa ha ei num realisar quella cun risguard dalla planisaziun locala, la lescha da baghegiar, il memorandum da baghegiar ni era las obligaziuns sco part dil plan da quatier. Igl areal lubescha bia, mo buca tut.» Las ideas ed ils giavischs nudai sils differents stans vegnan evaluai ussa e lu presentai alla secunda sentupada da participaziun primavera proxima. Beat Aliesch ha dilucidau la procedura e ha detg: «Decisiv ei la fin finala quei che vegn scret sils cedels. Cun quei savein nus far zatgei. Ei dat neginas ideas ni giavischs ch’interesseschan buca nus.»
La participaziun cun ideas e giavischs pertuccont igl areal Hess sa era succeder online. Persuenter ha la vischnaunca scaffiu la plattafuorma www.mitwirken-disentis.ch.
Hotel Acla da Fontauna: Situaziun deplorabla
Cun occasiun dalla sentupada da discussiun pertuccont igl areal Hess/Couchepin il venderdis sera en halla Cons ei il president communal René Epp s’exprimius cuortamein era davart la procedura da concuors dall’Immo Invest Partner AG: «Nus deplorein la situaziun. Nus sperein ch’ils investurs vegnien da liquidar la caussa e reglar lur obligaziuns finanzialas. In aspect positiv ei ch’il baghetg ei spazzaus, che la ruina ei naven.» La lubientscha da baghegiar pigl entir cumplex cun hotel, habitaziuns administradas e secundaras hagi vinavon vigur legala. (fmr/hh)
Gust da leger dapli?