Fiasta d’avertura dil «mund dils pirats»

(anr/hh) Sonda proxima, ils 22 da december 2018 vegn aviert a Sursaissa il parc «Snowli el mund dils pirats». La Scola da skis e snowboard Sursaissa offerescha differentas attracziuns. Naven dallas 17.00 vegnan ils affons smincai ed allas 18.00 ei la fiasta d’avertura ufficiala cun ustria, plaids ed ina demonstraziun dil Team Saas, igl actual campiun svizzer, sco era ils Wisalis dil Club da skis Sursaissa. Ei suonda in fiug artificial e naven dallas 20.30 divertiment. Sin quella moda vegn dau la caschun da prender d’enconuscher e da visitar il niev paradis dil sport da neiv per affons. Il project ei daventaus realitad grazia ad in’acziun da crowdfunding cun sustegn denter auter da Carlo Janka e Christian Spescha, mo era dalla vischnaunca da Sursaissa Mundaun. Miez october ha la radunonza da vischnaunca numnadamein decidiu cun grond pli in credit per la cumpra da tschentas da transport.