Bain per «via»

DA GION NUTEGN STGIER / ANR

L’onn 2018 vegn la Viafier retica a scriver bunas cifras. Il dumber dals passagiers transportads fin a la fin da november è s’augmentà per 3,3%. Da nov ha ella er in tren ch’è vegnì transfurmà en ina stanza da sedutas rollanta. Ier han Renato Fasciati, il directur da la Viafier retica, e Stefan Engler, il president dal cussegl d’administraziun, fatg ina bilantscha intermediara da l’onn da gestiun 2018. Omadus discurran d’in fitg bun onn da fatschenta. Grazia a l’aura da belezza ha la Viafier retica transportà fin als 30 da november 3,3% daplis giasts. La fin finala possia il manaschi quintar quest onn cun in pau dapli che 12 milliuns passagiers, ha ditg Fasciati. Engler, el ha menziunà che be cun las entradas dals bigliets vegnia la Viafier retica a surpassar ils 100 milliuns francs. In grond augment ha la Viafier retica gi cun 12,4% sin la lingia da Cuira–Arosa, quai cunzunt pervia dal nov parc d’urs cun l’urs «Napa». Er sin il traject Landquart–San Murezzan han ins gì cun 12,1% daplis passagiers in grond augment.

pagina 15