Quantas guglias ò igl mies pignoul?

(pb) Simbols da Nadal dattigl blers. Chegl è franc la staletta cun tot las figuras anturn, chegl èn las bleras canzungs da Nadal, chegl èn pero er igls pignouls da Nadal. Seia chegl ainten steiva, sen ena plazza e per lung dallas veias. Savens decoros cun candeilas, gleischs e culas. Igls pignouls da Nadal èn mianc en usit schi vigl. Antschet ò el an Tera tudestga igl 19avel tschentaner ed è sa deraso per igl antier mond anturn. Pitost ainten las teras dalla hemisfera digl nord. Pertge en pignoul, scu igl pled dei, è en pegn pitschen. E pegns dattigl ple u manc angal ainten la hemisfera digl nord. Cò dattigl differentas sorts scu igl normal pegn, i dat igl pegn blo, igl ivez, igl pegn da Nordmann ed alloura anc otras sorts parantadas. Ena premissa per saveir duvrar el scu pignoul da Nadal è tgi el porta las guglias er d’anviern. Igl laresch vign cò betg an dumonda perchegl tgi el perda las guglias igl aton. Ma i pudess er esser en tiev u en zundrign. Pertge betg? Ma scu gio menziuno ègl igl ple en pegn pitschen. En pignoul.

Pertge ena tala dumonda?

Ma quantas guglias ò en pignoul ansomma? Ma chegl è bagn en po ena dumonda curiousa. Prest stupida. Tge amporta chegl quantas guglias tgi en pignoul ò! Chegl è er ansomma betg essenzial.

Ma ia az vi dar ena clera rasposta sen la dumonda: Igl mies pignoul ò bel exact 2 800 133 guglias. Ea, ia saint vusoters a reir. Ma chegl è nignas manzignas. Ea, betg chel da chest onn, lez sunga anc mianc sto per tot. Ma chel digl onn passo veva exact chel domber da guglias tgi ia va inditgia. Ea, i pudez reir anavant, ma gl’è propa uscheia.

Igl mies pignoul da Nadal 2017 era 2,20 meters lung. Igl de dalla viselgia da Nadal vagn nous mess el ainten steiva ainten chel recipient aposta. I vagn mess aint ava e vurdo tgi el vegia adegna ava avonda. E durant igl antier taimp da Nadal anfignen Buneia ò el betg pers ena suletta guglia.

En’ideia gloriousa

Durant las lungas seiras sur las festas e la midada digl onn era magari starnia segl canipe e veva adegna igl pignoul ainten îgl. Ensacuras am ègl nia en tschert basigns fitg profond da leir saveir quantas guglias tgi chel, igl mies pignoul, vegia. Ed ia va prest rot or la testa per cattar en sistem scu neir sessour igl domber dallas guglias. Dumbrar? Chegl fiss franc ena pussebladad, ma cò pudessa neir nar. Ed ia savess mai dretg noua eir anavant cun dumbrar. Alloura vessa gia da signier mintga guglia dumbrada cun en’otra calour. Na, chegl geva betg e chegl vess cuzzo aglmanc anfignen veadaint per la stad. E da luvrar, magler e durmeir vessa er anc gia. Chegl fiss sto en project per passa en onn.

Ed ena seira, puspe starnia sen igl mies migler colleg, am è neida l’ideia gloriousa. Danonder saia betg. Schi gl’è sto inspiraziun digl Bambin u schi egn digls rètgs sabis ò laschea neir andamaint, ni steilas e gligna, glez na saia betg.

La mia ideia è stada la suandonta. Da Buneia seira è neida allontanada la decoraziun digl pignoul. Ia va piglia el e mess el ainten ena stanza betg duvrada. Ia va mess se la pegna e surlaschea el agl tgod ed alla sitgira. Igl sies destign è sto sagialo: Sivamang èn las guglias neidas bregnas e curdadas. Siva dus emdas veva igl mies bung pignoul betg se ple ena suletta guglia. Tottas eran crudadas. Er chellas digl best. Igl pignoul era blot e setg ed è rivo ainten pegna. Ed ossa tar la metoda geniala scu cattar or quantas guglias tgi igl mies pignoul veva. Ia va piglia ansemen exact 1000 guglias. Siva vaia passo chellas e nudo la peisa. Sessour vaia scuo ansemen tot las guglias digl pignoul e mess ellas ainten en satg da plastic. Ossa vaia paso igl antier satg e tratg giu la tara ed uscheia gia la peisa totala da tot las guglias. Ed igl rest è en simpel chint: La peisa per 1000 guglias vaia partia sen 1000, alloura vaia gia la peisa dad ena guglia. Alloura vaia piglia la peisa digl antier satg sainza tara e partia tras igl peis dad ena guglia. Igl resultat tgi è cumparia sen igl mies dumbrader digital: 2 800 133 guglias!