La pura fa valair ses interess

Dad Andreas Cadonau / ANR

L’Uniun da las puras svizras fa propostas concretas entaifer la cuntinuaziun da la politica agrara co segirar il status social da la pura. In mussament dad in augment da la schientscha da la pura svizra creschida sut l’egida da la presidenta actuala Christine Bühler. L’Uniun da las puras svizras fa la parita dad esser s’emancipada da l’uniun tetgala dals purs svizzers. L’organisaziun da las puras è bain integrada e represchentada en la suprastanza da l’Uniun purila svizra. Tuttina piglia ella posiziun a moda specifica en diversas spartas da la politica agrara. L’Uniun da las puras svizras ha ina atgna cumissiun che sa fatschenta cun la politica agrara ed a quella cumissiun appartegn la pura grischuna Yvonne Bannwart. Ella ha explitgà las stentas da l’Uniun da las puras svizras da meglierar il status social da la pura svizra e quai gia dapi otg onns. La proposta da l’Uffizi federal d’agricultura fatga entaifer la cuntinuaziun da la politica agrara ha dentant era l’Uniun da las puras svizras valutà per betg applitgabla. La confederaziun ha proponì da sulet pajar pajaments directs a manaschis purils ch’hajan segirà il status social da la pura. Bannwart ha explitgà la cuntraproposta stipulada da l’uniun da las puras entaifer l’actuala fasa da consultaziun. Numnadamain da colliar la prontadad dal manaschi puril da contribuir finanzialmain a la segirtad sociala da la pura cun il dretg da retschaiver la contribuziun da basa. Ina contribuziun nova previda per tut ils manaschis purils e finanziada dad ina midada entaifer il sistem dals pajaments directs. Tenor las explicaziuns da Bannwart sa tractia dad ina summa annuala da circa 5000 francs per mintga singul manaschi puril svizzer. Sche quella proposta chatta la fin finala la via en la missiva dal cussegl federal ed ina maioritad en il parlament è per il mument intschert. Bannwart ha dentant fatg attent ch’ils fils davos las culissas sa stgaudian momentan pulit en chaussa.

Trair fil en guglia

Responsabla ch’ils fils en chaussa status social da la pura restian chauds è la presidenta da l’Uniun da las puras svizras, Christine Bühler. Ell’è dapi otg onns a la testa da l’Uniun da las puras svizras e dapi otg onns s’engascha l’uniun da meglierar la segirtad finanziala da la pura. Bühler ha gia procurà per in terratrembel curt suenter l’entrada en uffizi cun sia participaziun a la chauma da las dunnas. Ina presidenta da las puras svizras ad ina chauma da dunnas, quai è natiralmain stà ina sensaziun. Bühler enconuscha il gieu politic e posseda da blers contacts sur ils tschertgels agrars. Las schanzas per la proposta da l’uniun da las puras da colliar la contribuziun da tschep cun il status social da la pura valitescha Bühler per intactas. Ella ha discurrì da bunas reacziuns. Cler ch’il parlament sto acceptar la nova contribuziun da basa per mintga manaschi. Bühler ha ditg che var ina quarta dals manaschis purils svizzers contribueschia specific a la AVS ed a la cassa da pensiun a favur da la pura. Impurtant per cas da divorzi, malsogna u invaliditad. Bühler è conscienta che las puras s’engaschan ozendi pli fitg per ils agens interess e per ils interess dals manaschis ord optica da la pura. Uschia ha la presidenta da l’Uniun da las puras svizras prì datschertamain posiziun per l’iniziativa Fair Food, fertant che l’Uniun purila svizra ha decidì da desister sin ina posiziun.

Bunas notas

La presidenta actuala da l’Uniun da las puras svizras ha abditgà e la proxima radunanza da l’uniun da las puras digl avrigl vegn ad eleger ina successura. Bunas notas per ses engaschi retschaiva Bühler da la presidenta da la Secziun chantunala da las puras grischunas, Astrid Derungs. Ell’attribuescha a la presidenta partenta da l’Uniun da las puras svizras in ferm engaschi a favur da l’agricultura e da la famiglia purila cun ina profunda enconuschientscha da la materia. Impurtant tenor Derungs è medemamain ina buna collavuraziun e preschientscha entaifer l’uniun purila. Sulet communablamain vegnian ins la fin finala da defender ils interess da l’agricultura ed uschia era da la pura. In’opiniun partida da Bannwart. E pertutgant la successiun da Bühler ha Bannwart discurrì dad in cas da cletg e dad ina ferma candidata. Pronta da surpigliar il presidi da las puras svizras è la giurista e pura Anne Challandes. Bannwart enconuscha ella bain nà da la lavur communabla en la cumissiun da la politica agrara da l’Uniun da las puras svizras. Tant Bannwart sco Bühler han plaschair e chattan cuntentienscha en lur engaschi a favur da la pura e la politica agrara. E tema da lungurella nun ha la presidenta partenta. «Insaco ha la lavur adina chattà mai.»