Inscunter cun dus cineasts a Soloturn

da Claudia Cadruvi / ANR

Ier èn ils dis da film a Soloturn ids a fin nua ch’er adina puspè films rumantschs vegnan mussads. Quest onn è per exempel «Amur senza fin» stà sin il program. L’anr ha inscuntrà a Soloturn ils dus cineasts Susanna Fanzun e Hercli Bundi. Omadus han gia pliras giadas gì la quida da preschentar films documentars durant quest festival. En l’intervista raquintan els tge sentiment che quai è e tge muntada ch’i ha per in cineast. Els discuteschan era davart lur lavur, pertge omadus sa fatschentan cun artists. Il nov film da Bundi purtretescha l’artist contemporan austriac Christian Eisenberger. E Fanzun lavura gist vi dad in film davart la famiglia dals Giacomettis. «Nagin è anc sa profundà en la dumonda dal collectiv da questa famiglia», explitgescha la cineasta. «La famiglia è il punct da partenza dad uschè bler. Tge è capità tar ils Giacomettis ch’els èn vegnids ora sco quai ch’els èn vegnids ora? Jau n’hai betg l’intenziun da far in film d’art elitar, ma jau hai l’ambiziun da far in film ch’interessescha era quels che sa confundan cun art. Jau less mussar aspects novs.»

paginas 2 e 3