Investiziuns da 20 milliuns a Casti

(rtr) A la radunanza communala da mesemna saira è vegnì preschentà il studi davart la realisabladad d’ina nov’administraziun da la vischnanca Albula/Alvra. Ils resuns da la populaziun èn stads per gronda part positivs. En il rom da la fusiun è vegnì decidì che l’administraziun communala duess esser en il center da la vischnanca a Casti. Il lieu actual dasper la baselgia sin in mut n’è tenor la vischnanca betg uschè adattà, uschia ch’ins vul fabritgar ina nova chasa communala a la staziun. Il studi davart la realisabladad ed in concept da traffic è vegnì fatg dal biro d’inschigner Hartmann & Monsch SA. Tenor il studi pudessi dar in bajetg nov cun quatter auzadas là nua che la posta sa chatta actualmain. Plinavant duessi dar in nov terminal per ils autos da posta ch’ademplescha las pretensiuns per persunas cun impediment. Tenor la lescha ston questas adattaziuns esser realisadas enfin la fin dal 2023. Il buffet da la staziun vegniss destruì ed i dess là ina rundella. Il studi prevesa da far in nov bistro en la remisa da la Viafier retica. Sche tut ils giavischs vegnissan realisads tenor il studi, alura custass tut radund 20 milliuns francs. En questa summa èn inclus ils custs per in sutpassadi ed in parcadi da l’autra vart da la staziun sco er in nov terminal da bus ed ina nova rundella sin la via chantunala. L’entir project po vegnir realisà en pliras etappas. Plinavant ha la radunanza communala decidì da vender immobiglias che na vegnan betg pli duvradas da la vischnanca Albula/Alvra. Vendidas vegnan la chasa Caschnera ad Alvaschagn, l’anteriura chasa communala da Mon sco era la chasa Mezvei da Stierva. Betg en votaziun è ida in’immobiglia ad Alvagni bogn che duai vegnir vendida, là aveva gia l’anteriura vischnanca decidì da vender l’anteriura chasa da scola. Ultra da quai è vegnida approvada la lescha davart il dretg da burgais. Quai è stà necessari pervi da la lescha federala e chantunala ch’è vegnida revedida totalmain. Approvads èn vegnids ils suandants rendaquints finals: Stierva: Sanaziun da la via locala da vischnanca e l’amplificaziun da l’avertura da guaud ed alp. Casti: Annexa e midada da construcziun da la staziun da transfurmaziun sco era la furniziun d’urgenza da l’ovra electrica a partir da la centrala da la ALK.