La pbd dal Grischun sa legra 
ch’ils tschains d’aua restan

(cp) Cun plaschair prenda la pbd dal Grischun enconuschientscha da la decisiun dal parlament federal da betg sbassar ils tschains d’aua. La decisiun dal parlament federal da vulair mantegnair ils tschains d’aua enfin ils 2024 senza als midar legra la pbd dal Grischun. Ella aveva refusà veementamain l’intenziun da vulair «flexibilisar ils tschains d’aua».

«En realitad avessi sa tractà da minimar las sperditas da pliras milliardas, ch’ils concerns da forza electrica han subì ils ultims onns, e da cumpensar las consequenzas dal prietsch dal current sbassà cun agid da la fiera da current electric europeana», è la persvasiun da Benno Niggli, il parsura da la pbd dal Grischun. La fin finala saja quai stà nagut auter ch’in’attatga malgista sin las finanzas dals chantuns e da las vischnancas da muntogna.

Er il cusseglier naziunal Duri Campell ha prendì enconuschientscha da la decisiun dal cussegl naziunal cun gronda satisfacziun. Per sbassar ils tschains d’aua na dettia quai nagins motivs, pertge durant ils onns passads èsi vegnì impedì pliras giadas d’augmentar il supplement pertutgant l’accumulaziun d’aua; ils gudogns dals concerns da current electric èn vegnids prelevads e las taglias sin quels èn vegnidas incassadas en la Bassa.

«I na po betg esser ch’i vegn chaschunada ina sperdita per il chantun Grischun pervia d’in sbassament massiv dals tschains d’aua d’enfin 75 milliuns francs suenter tant blers onns cun gronds gudogns e tant paucs onns cun sperditas», argumentescha Campell. «Uschè ditg che las societads da la producziun da forza electrica na mussan betg transparenza cumplaina na duai questa fatschenta betg pli vegnir tractada.»